Отут кыраадыстаах куйаас түһэн, сөтүө кэмэ саҕаланна. Дьокуускай куоракка бэс ыйа саҕаланыаҕыттан, 202-с микрооройуоҥҥа баар пляж аһылла да илигинэ, оҕолор сөтүөлээн киирэн барбыттара.
Куорат пляһа бу күннэргэ аһыллара күүтүллэр. Ол туһунан бэс ыйын 17 күнүгэр мэрия дьаһалтатыгар кэпсэттилэр. Бу иннинэ Роспотребнадзор 16 сиртэн уу анаалыһын, 12 сиртэн кумах боруобатын ылан бэрэбиэркэлээбитэ. Уу анаалыһа нуормаҕа эппиэттиир диэн буолла, кумах анаалыһын түмүгэ бэс ыйын 20 күнүн кэнниттэн биллиэхтээх.
Ону тэҥэ, сөтүөлүүр сири ыраастааһын, өрөмүөннээһин үлэтэ, сынньанарга табыгастаах усулуобуйаны оҥоруу салҕанар.
Ууга сэрэхтээх буолуҥ!
Төһө да сэрэтии баарын үрдүнэн, сайын уонунан киһи ууга түһэн, суорума суолланар. Холобур, түргэн сүүрүктээх, дириҥ аппалардаах ууларга (Петуховка пляһыгар, о.д.а.) элбэх киһи быыһаммат.
Тимирии биричиинэтэ тугуй? Сүрүннээн арыгыны иһэн баран, сөтүөлээһин, билбэт сиргэ, дириҥ, сүүрүктээх ууга киирии, куйаас күҥҥэ тымныы ууга киирэн иҥиир тардыыта, уо.д.а.
Өскөтүн ууга сылдьан атах иҥиирэ тартаҕына, хамсата сатаабакка, тиэрэ сытан, уоскуйа сатыахха наада, оннук сыппытынан харбаан, кытылы була сатыахтааххын.
Түргэн сүүрүктээх, эмпэрэ кытыллаах өрүскэ, үрэххэ сөтүөлүүр, оҥочолорго, катердарга чугаһыыр сатаммат. Ону тэҥэ, оҕолору көрө-истэ сылдьыахха наада. Оҕо сөтүөлүү сылдьан күҥҥэ быһа сиэппэтин, умса сылдьан ууну испэтин курдук эрдэттэн үөрэтиллиэхтээх. Тоҕо диэтэр, ууга араас бактериялар, инфекциялар баар буолуохтарын сөп.
Ангелина ВАСИЛЬЕВА, “Саха сирэ” хаһыат, edersaas.ru