Урут оҕо сылдьан кэмпиэт суутун, маарканы эрэ мунньар эбит буоллахпытына, билигин сорох дьон сүүһүнэн хомуһу, оннооҕор ботуруону мунньар дьон бааллар. Бу күннэргэ Мэҥэ Хаҥалаc Нуораҕанатыгар өрөспүүбүлүкэ араас муннуктарыттан 70-ча киһи мустан, коллекцияларын олохтоохторго көрдөрдүлэр.
Сонун тэрээһиҥҥэ Уус Алдантан, Тааттаттан, Амматтан, Хаҥаластан, Дьокуускайтан, Бүлүүттэн тиийэ кэллиллэр. Өрөспүүбүлүкэтээҕи таһымнаах коллекционердар быыстапкаларын «Иэйии» түмсүү салайааччыта Клавдия Ефимова иилээн-саҕалаан ыытта.
Уус Алданнааҕы «Умсулҕан» түмсүү салайааччыта Станислав Луковцев: «Бу Бороҕоҥҥо ыытыллыбыт коллекционердар көрсүһүүлэрин түмүктүүр тэрээһинэ буолла. Саҥа коллекционердары кытары билистибит. Быыстапкаҕа эдэриттэн эмэнигэр диэри уопсайа 70-ча киһи кыттыбыт. Саамай кыра кыттааччы 6 саастаах. «Киндер» сакалаат оонньуурдарын хомуйар», – диэн edersaas.ru сайтка иһитиннэрдэ.
Дьикти дьарыктаах дьон харахтарын харатын курдук харыстаан мунньа сылдьар кыптыыйдарын, кыыллар-көтөрдөр сувенирдарын, куукулаларын, сүүтүктэрин, банаардарын, араас тиэмэлэринэн хаһыакка, сурунаалларга тахсыбыт араас суруйууларын улаханнык сэргээн, нуораҕаналары сэргэхситтилэр.
Анивера АКИМОВА, «Саха сирэ» хаһыат, edersaas.ru