«Сүрэҕи тымнытан” эпэрээссийэлиир буоллулар
Олох-дьаһах - Саха ыала

«Сүрэҕи тымнытан” эпэрээссийэлиир буоллулар

Саха сиригэр сэтинньи 6-8 күннэригэр Медицина национальнай киинигэр сүрэх аритмиятын тымныынан эмтээһин (криоблация) эпэрээссийэтэ аан бастаан оҥоһулунна.

edersaas.ru

Эпэрээссийэни ыарыыны быһаарарга уонна эмтииргэ рентгенхирургия ньымаларын отделениетын сэбиэдиссэйэ Леонид Павлов уонна рентгенэндоваскулярнай диагностика уонна эмтээһин бырааһа Чингиз Степанов оҥордулар. Маннык эпэрээссийэ Арассыыйаҕа 2016 сылтан туһаныллар.

Тымныынан эмтээһин (криоблация) эпэрээссийэтин уратытынан ханнык да норкуоһа суох, Arctic Front Advance криобаллону туттуу уонна эпэрээссийэ оҥоһуллар кэмэ кылгаан биэрэрэ буолар. Криобаллон аритмия үөскээһинин төрүөтүнэн буолар миокардия учаастактарыгар тымныынан дьайар.
Эмчиттэр этэллэринэн, тымныынан эмтээһин — кардиология салаатыгар инникилээх хайысха. Сүрэх тэтимин кэһиллиитигэр тириэрдибит көрдүгэннэр баар тымырдарыгар анал катетер-баллону уган ону үрдэрэллэр, “сүрэҕи тоҥороллор”. Маннык ньыма хирурга арыый судургу, эпэрээссийэҕэ көмөлөһөөччүлэр эпэрээссийэ хаамыытын барытын көмпүүтэргэ көрө, кэтии олороллор. Өссө эпэрээссийэ иннинэ аритмия көрүҥүн чопчулууллар.
Леонид Павлов иһитиннэрбитинэн, урут аритмиялаах дьону дойду кииннэригэр эпэрээссийэҕэ ыытар этилэр. Оттон билигин Саха сиригэр бэйэтигэр маннык үрдүк технологиялаах эпэрээссийэни оҥоруохха сөп буолла.
Тымныынан эмтээһин эпэрээссийэтэ билиҥҥитэ 8 киһиэхэ оҥоһулунна. Сыл бүтүөр диэри өссө 60-ча киһи эпэрээссийэлэнэрэ былааннанар.

Надежда ЕГОРОВА, “Саха сирэ”, edersass.ru

СӨ Доруобуйа харыстабылын министиэристибэтин хаартыскалара туһанылыннылар

0
0

Сайт матырыйаалларын ааптар көҥүлэ суох ылар бобуллар.

Ваш e-mail не будет опубликован.

5 × 2 =