Тохсунньу 15 күнэ үүнэр түүнүгэр S7 авиакомпания Саха сиригэр көтөн испит 107-с рейсигэр эмчиттэр ыарыһаҕы быыһаабыттарын туһунан суруйбуппут.
Надежда ЕГОРОВА, «Саха сирэ» хаһыат, edersaas.ru
Пассажирдартан биирдэстэрэ «Мин туругум мөлтөөрү гынна…» диэн бортпроводницаларга үҥсэргээбитигэр, «Сөмөлүөт иһигэр эмчиттэр бааллар дуо?» диэн хаһыы иһиллибит. Тута икки киһи көмөҕө сүүрэн кэлбит. Ол «Фтизиатрия» НПК реанимацияҕа фельдшерэ Александр Алексеев уонна Хаҥалас улууһун киин балыыһатын медицинскэй сиэстэрэтэ Любовь Данилова этилэр.
Эмсэҕэлээбит эр киһи сирэйэ-хараҕа номнуо көҕөрөн эрэрэ, салгыны эҕирийэ сатыы олороро…
Кинини быыһаабыт эмчиттэр бэйэлэрин ханнык да дьоруой курдук санамматтар. Любовь Данилова ыарыһаҕы быыһыырга көмөлөспүт пассажирдарга махталын биллэрэр. Ким суумкатыгар туох эмтээҕинэн биэрбиттэрин, сыаналаах водкатын биэрбит эр киһи эмиэ баарын туһунан кэпсээтилэр.
Сөмөлүөт түһээтин кытары ыарыһаҕы реанимаболь биригээдэтигэр туттарбыттар.
Билигин ыарыһах Дьокуускай куораттааҕы клиническэй балыыһаҕа эмтэнэр. Туруга тупсан, кини олоҕор куттал суоһаабат. Кыырай халлааҥҥа кини олоҕун быыһаабыт үрүҥ халааттаах аанньалларга махталын биллэрэр.
Балыыһа эмчиттэрэ быһаарбыттарынан, ларингоспазм – бэлэс бопторуута. Суһал медицинскэй көмөнү кэмигэр оҥорботоххо, итинник ыарыһах тыына хаайтаран өлөр кутталлаах.
Надежда ЕГОРОВА, «Саха сирэ» хаһыат, edersaas.ru