Нам улууһугар суол быһылааныгар үс киһи өлүүтүгэр буруйдаах такси суоппарыгар суут бириигэбэрэ тахсыбытын туһунан СӨ Борокуратууратын пресс-сулууспата иһитиннэрэр.
Суут быһаарбытынан, сууттанааччы «Toyota Hiace» массыынатыгар эбии үс олбох туруоран, 2018 сыл кулун тутар ыйыгар Дьокуускай куораттан Бүлүүгэ дьону илдьэн испит.
Ол айаннаан иһэн, «Бүлүү» федеральнай суол 149-с километрыгар уун-утары атын массыынаҕа тиийэн саайыллыбыт. Ол түмүгэр, эбии олбохторго олорсон испит үс киһи тута миэстэтигэр өлбүт.
Суут таксиһы РФ Холуобунай кодексатын 238-с ыст. 3-с чааһынан, ол эбэтэр, туһанааччылар олохторугар уонна доруобуйаларыгар куттал суоһаабат ирдэбиллэригэр сөп түбэспэт өҥөлөрү оҥорон, сэрэҕэ суохтан үс киһи өлүүтүгэр тиэрдиигэ буруйдааҕынан билинэн, 3 сылга уопсай эрэсиимнээх холуонньаҕа көҥүлүн быһарга уурбут.
Бириигэбэр сокуоннай күүһүгэр киирэ илик, өрүттэр ааһыныахтарын сөп.
Биһиги корр., «Саха сирэ» хаһыат, edersaas.ru
Хаартыска: интэриниэттэн.