Ханнык баҕарар үөрэххэ киирэргэ биир кэлим эксээмэн (ЕГЭ) баалыгар эбии баалы ылыахха сөп. Ол туһунан саайпытыгар суруйан турабыт. Бүгүн ону чопчулаан биэриэхпит.
edersaas.ru
Хайдах, диэн ыйытыы үөскүүр. Биллэн турар, оҕо тус ситиһиитин көрдөрүүтүнэн. Ол курдук, эбии баалы ГТО бэлиэтин, оскуоланы мэтээлинэн бүтэрдэххэ, араас олимпиадаларга, кэмпириэнсиэйлэргэ миэстэлэстэххэ ылыахха сөп. Ол эрээри, ханнык олимпиадаларга миэстэлэһии иһин эбии баал эбиллэрин үөрэх кыһата бэйэтэ быһаарар. Манна биири чопчулуур ирдэнэр. Оҕо улуус даҕаны таһымнаах олимпиадаҕа миэстэлэспит буоллаҕына, баал эбиллэр диэн толкуйдуур сыыһа. Оннук буолбатах!
2017-2018 үөрэх дьылыгар Хотугулуу-Илиҥҥи федеральнай университет 19 хайысхаҕа үөрэнээччилэр Хотугулуу-Илиҥҥи олимпиадаларын (СВОШ) ыытар. Итинтэн иккитэ Оскуола үөрэнээччилэрин Арассыыйатааҕы сэбиэтин испииһэгэр киирэр. Ити олимпиада хайысхатыгар миэстэлэспиттэргэ ХИФУ-ка туттарсарга 10 баалга диэри эбиллэр. Химияҕа уонна филологияҕа миэстэлэспиттэр (Оскуола үөрэнээччилэрин олимпиадаларын Арассыыйатааҕы сэбиэтин испииһэгэр киирэр) Арассыыйа үрдүк үөрэхтэрин кыһаларыгар үөрэххэ туттарсалларыгар тургутууну ааһымыахтарын эбэтэр, өскөтүн, үөрэх уопсай биридимиэттэригэр биир кэлим эксээмэннэрин 75 баалтан үрдүккэ туттарбыт түгэннэригэр, 100 баалга тэҥнэһиэн сөп. Манна даҕатан эттэххэ, Үөрэнээччилэр Хотугулуу-Илиҥҥи олимпиадалара (СВОШ) номнуо саҕаланнылар.
Быйыл, холобура, Хотугулуу-Илиҥҥи федеральнай университекка туттарсыбыттарга ГТО-ҕа кыһыл көмүс бэлиэҕэ — 2 баал, үрүҥ көмүскэ — 1 баал, оскуоланы кыһыл көмүһүнэн бүтэрбиттэргэ — 7 баал, үрүҥ көмүһүнэн бүтэрбиттэргэ — 5 баал, орто профессиональнай үөрэҕи туйгун сыананан бүтэрбиттэргэ 3 баал эбиллибитэ.
Онтон Саха Государственнай тыа хаһаайыстыбатын академиятыгар оскуоланы кыһыл көмүс мэтээлинэн бүтэрбиттэргэ 5 баал, ГТО-ҕа кыһыл, үрүҥ көмүс бэлиэни ылбыттарга 4-түү баал эбии ааҕыллыбыта. Итини сэргэ Чугуновскай уонна Илларионовскай агро-ааҕыыларга миэстэлэспит, дипломант аатын сүкпүт оҕолорго 4-түү баал эбиллэр диэбиттэрэ.
Ити курдук, хас биирдии үөрэх кыһата бэйэтэ туспа ирдэбиллэрдээх. Онон туһааннаах үөрэх кыһаларыгар киирэн эрдэттэн билсэр, чопчулуур ордук.
Людмила ПОПОВА, “Саха сирэ” хаһыат, edersaas.ru
Хаартыска: интэриниэттэн.