Саҥа дьыл түүнэ… 12 чааһы ылыы, оливье сии-сии Путин этиитин истии, бэлэхтэри бэрсии, салюту ытыы, тэлэбиисэр көрө-көрө аһааһын… Ис ыалдьыар диэри симтэн, тэлэбиисэр ырыатыттан куу-хаа буолан баран, сарсыарда диэкинэн утуйуу…
Өскөтүн Саҥа дьылы көрсүү бырааһынньыга сылтан сыл биир халыыбынан хатыланан барар буоллаҕына, кыратык уларытыы киллэриэххитин баҕарбаккыт дуо? Бу алыптаах түүнү уратытык хайдах ылыахха сөбүй?
Баал-маскараат
Саҥа дьыл бырааһынньыга, бастатан туран, маскараатынан аатырар буоллаҕа. Онон оҕолор да, улахан дьон да бары маскарааттанан баран, театральнай инсценировканы, эбэтэр остуоруйаны туруораҕыт. Оруоллары эрдэттэн үөрэтэҕит, эрэпэтииссийэлиигит. Кылгас киинэни, испэктээкили да туруоруохха сөп.
Остуолга олорон, бу сыл хайдах ааспытын, туохха үөрэппитин, туох ситиһиилээҕин кэпсэтэн, махтанан атаарыахха наада.
Айылҕаҕа пикник
Ойуурга, эбэтэр пааркаҕа арыый эрдэ тиийэн баран, биир харыйаны (бэһи) булан киэргэтэҕит. Гирляндалары ыйыыгыт, муусука да холбуохха сөп. Кырааскалаах ууну тоҥорон, бэспиэһинньиктэри оҥорон, чүмэчилэри уматан, суол кытыытыгар субуруччу уурдахха, ураты көстүүлээх. 12 чааска шампанскайдары арыйан, итии чэй иһэн, аһыы түһээт, харыйа тула хоробуоттуугут. Бу кэмҥэ ойуур быыһыттан Тымныы оҕонньор тахсан кэлэр, эҕэрдэлиир, мөһөөччүгүттэн ылан бэлэхтэри туттарар. Оҕолорго дэлэлээх үчүгэй буолуо дуо?
Оттон Дьокуускайга мыраан үрдүгэр тахсан, фейерверктэри ыта-ыта көрсүөххэ сөп. Быйыл Саҥа дьыл түүн тумана суох, сылаас буолара күүтүллэр, онон куорат бүтүннүү күлүмүрдээн олороро кэрэ да көстүү буолуохтаах!
Уулуссаҕа көрсүү
Тымныы оҕонньор, Хаарчаана таҥаһын, атын да маскарааты таҥнан баран, уулуссаҕа тахсаҕыт. Билбэт дьоҥҥутун эҕэрдэлиигит, сампаан иһэҕит, оонньуулары тэрийэҕит, кэмпиэттэри биэртэлиигит, куорат устун күүлэйдиигит.
Дойдулар үгэстэрэ
Илинтэн саҕалаан, чаас аайы араас дойдулар Саҥа дьылы көрсөллөр. Эрдэттэн үөрэтэн, бу дойдуларга саҥа дьыллааҕы туох үгэстээхтэрин билэн баран, чаас аайы биирдии үгэһи толоруохха сөп. Холобур, Австрияҕа турбаны ыраастыыр киһини көрсөн баран, илиигин хоруонан бистэххинэ, сылыҥ бэркэ ааһар үһү.
Бирмаҕа бу күн Уу бэстибээлэ ыытыллар. Бу күн бары уунан ысыһаллар. Ким да өһүргэммэт – бу үгэс саҥа сылга дьолу, баайы-дуолу баҕарыы буолар. Болгарияҕа 12 чаас буолара 3 мүнүүтэ хаалбытын кэннэ уоту умуруораллар. Бу кэмҥэ бары уураһыахтаахтар. Италияҕа эргэ малларын түннүгүнэн быраҕаллар. Хаппыт изюмнары сииллэр – ким элбэҕи сиэбит, элбэх харчыланар.
Селфи-бэчэрииҥкэ
Туох эрэ тэрээһиҥҥэ сылдьан баран, наар хаартыскаҕа түһэ сатыыбыт. Саҥа дьылы көрсөргө фотозоналары, аксессуардары бэлэмнээн, сөп түбэһэр таҥаһы таҥнан баран, бэртээхэй фотосессиялары оҥоруохха сөп. Дьэ, манна табалаах сибиитэрэлэри кэтэн, Манна аппараатынан хаартыскаҕа түһэрэр киһи наада. Чэ, баҕар, үчүгэй төлөпүөннээх да киһи буоллун.
Кылаабынайа, күлэ-үөрэ бириэмэни бэркэ атаарыахха наада уонна үчүгэй хаартыскалар дьоллоох түгэҥҥитин үйэтитиэхтэрэ турдаҕа!
Ангелина Васильева, «Саха сирэ» хаһыат, edersaas.ru