Төрөөбүт тыл күнүгэр Былатыан Ойуунускай аатынан уус-уран сурук түмэлэ ыалдьыттарын сахалыы итии чэйдээх, алаадьылаах көрүстэ.
edersaas.ru
П.А. Ойуунускай аатынан бириэмийэ лауреата, түмэл сырдатар салаатын сэбиэдиссэйэ, суруйааччы Николай Егорович Винокуров – Урсун саха тылын төрдүн, инникитин туһунан кэпсээнинэн бэрт сэргэх санаа атастаһыыта буолла.
С.А. Новгородов алпаабытынан дьыктаан суруйуута түмэлгэ иккис төгүлүн ыытыллар. Быйылгы дьыктаан тиэкиһэ — 1923 сыллаахха тахсыбыт “Сурук-бичик” кинигэттэн “Хаар киһи” диэн тэттик кэпсээн.
Түмэл үлэһитэ Ньургуйаана Халгаева дьыктаан түмүгүн туһунан маннык кэпсээтэ:
— Былырыын бастакы дьыктааммытыгар 40-ча киһи кыттыбыта. Быйыл 20-чэ киһи суруйда. Бу күн хас да сиргэ дьыктаан суруйуута ыытыллар буолан, кыттар дьоммут ахсаана аҕыйаата быһыылаах. “5” сыананы Дьокуускай куорат национальнай гимназиятын саха тылын уонна литэрэтиирэтин учуутала Степан Ноев, эмиэ бу гимназия алын кылааһын учуутала Иннокентий Петров уонна ХИФУ уһуйааччыта, ф.н.х. Лидия Манчурина ыллылар.
Түмэлбитигэр саха тылыгар анааллаах тэрээһиннэри, быыстапкалары сылы төгөрүччү ыытабыт. Билигин икки быыстапка үлэлии турар: “Латыын алпаабытынан тахсыбыт үөрэх маҥнайгы кинигэлэрэ” — диэн ааттаах. Манна 1897 сылтан 40-с сылларга диэри тахсыбыт букубаардар туруоруннулар.
Иккис – “Билии, үөрэх –олох төрдө» диэн быыстапкаҕа 200-чэкэ араас тиэмэлээх, тастаах кырачаан кинигэлэр, ону таһынан уруучукалар, открыткалар, значоктар бааллар.
Степан Ноев, национальнай гимназия учуутала:
— Новгородов алпаабытынан бастакыбын дьыктаан суруйдум эрээри, “5” сыананы ылан олус үөрдүм. ХИФУ ХИНТуоКҮ саха уонна турок тылын салаатын бүтэрбит буоламмын, латыынныы алпаабыт чугас курдук. Онон суруйарга ыарырҕаппатым быһыылаах. Оскуолам оҕолоругар Новгородов алпаабытынан дьыктаан суруйтарар былааннаахпын.
Ньургуйаана Иванова, «Саха сирэ» хаһыат, edersaas.ru
Хаартыскалар түмэл үлэһитин Виталий Слепцов түһэриитэ