Киин куоракка «Россия» диэн киинэ саалата аһыллыаҕа...
Олох-дьаһах - Эдэр саас

Киин куоракка «Россия» диэн киинэ саалата аһыллыаҕа

Бэс ыйын 7 күнүгэр Өксөкүлээх Өлөксөй аатынан Норуоттар доҕордоһууларын дьиэтигэр «Россия» диэн киинэ саалата аһыллыаҕа.

 edersaas.ru

«Россия» киинэ саалатын олоххо киллэрэн эрэр дьон суруналыыстарга уонна киин куорат уопсастыбанньыктарыгар пресс-кэмпириэнсийэ ыыттылар.

Өксөкүлээх Өлөксөй аатынан Норуоттар доҕордоһууларын дьиэтин генеральнай дириэктэрэ Яна Игнатьева санаатын маннык үллэһиннэ:

—  1980 сыллаахха аһыллыбыт дьиэ Профсойуустар дыбарыастарын быһыытынан аһыллыбыта. Онно киинэ көрдөрөр этилэр.  Киинэ саалатын аһар туһунан биһиги биэс сылы быһа баҕа санаа ымыыта оҥостон кэллибит. Ол баҕарбыт санаабыт Киинэ пуондатын гранын ыламмыт, дьэ туолла.

«Россия» диэн киинэбит саалатын мээнэҕэ ааттаабатыбыт. Биһиги тэрилтэбит национальнай-култуурунай холбоһуктары, диаспоралары кытта үлэлиир. Онон бу аат үлэбит хайысхатыгар сөп түбэһэр. Былааммытыгар «Арменфильм», «Казахфильм», «Узбекфильм» киинэ устуудьуйаларын күннэрин ыытыахпыт, айар куттаах дьону – киинэ артыыстарын кытта көрсүһүүлэри оҥоруохпут. Бастакы «хараҥаччыбыт» — Владимир Федоров «Созвездие Марии» пьесатыгар олоҕуран уһуллубут киинэ. Онон саала аһыллыытын бэйэбит киинэбитинэн сүрэхтиэхпит.

«Саха сиринээҕи өрөспүүбүлүкэтээҕи киинэ ситимэ» кинематографистар ассоциацияларын салайааччыта Петр Чиряевтан суруналыыстар «Киинэ саалатын оҥорууга төһө үп-харчы көрүлүннэ?» — диэн ыйытыыларыгар маннык хоруйу биэрдэ:

— 5 мөл. солк. үп көрүллүбүтэ. Ол харчынан киинэ көрдөрөр тэрили, тыаһы-ууһу улаатыннарар, таҥар күүстээх проектары, киинэ көрөр экран ылбыппыт. 600 миэстэлээх саалаҕа күҥҥэ үс-түөрт киинэни көрдөрүөхпүт. Репертуарбытын төһө кыалларынан дириҥ ис хоһоонноох, көстүүлээх уонна элбэх киһи тардар гына оҥоро сатыахпыт. Киинэлэрбит рекламатын, бэчээттииргэ интэриниэт таһаарыылары кытта дуогабар түһэрсэн, эрдэттэн киинэ репертуарын оҥорон бэчээттиир буолуохпут.

Дьэ, онон бэс ыйын 7 күнүттэн Өксөкүлээх Өлөксөй аатынан Норуоттар доҕордоһууларын дьиэтигэр аны киинэ көрөр буолуохпут.

Елена ПОТОЦКАЯ, «Саха сирэ» хаһыат, edersaas.ru

Хаартыска —  Любовь Шишигина түһэриитэ.

 

0
0

Сайт матырыйаалларын ааптар көҥүлэ суох ылар бобуллар.

Ваш e-mail не будет опубликован.

5 × 1 =