Саха сирин идэлээх сойууһун 95 сылын “СӨ ОДьКХ” ГУП холбоһуктаах территориальнай профсоюзнай тэрилтэтэ үлэҕэ ситиһиилэрдээх көрсүбүтэ.
Чуолаан, социальнай бииргэ үлэлээһиҥҥэ “СӨ ОДьКХ” ГУП өрөспүүбүлүкэҕэ иккис миэстэни ылбыта. Маныаха коммунальнай хаһаайыстыба тэрилтэтэ ылыммыт кэлэктиибинэй дуогабарын туолуутугар ыыппыт үлэтэ кэрэхсэммитэ. Онон профсоюз тустаах тэрилтэтэ РФ Идэлээх сойууһун Бочуоттаах Грамотатынан наҕараадаланна. Холбоһуктаах территориальнай профсоюзнай тэрилтэ бэрэссэдээтэлэ Сергей Анисимов РФ Олоҕу-дьаһаҕы хааччыйыыга профсоюһун КК “Кыһыл көмүс” бэлиэтинэн наҕараадаланар чиэскэ тигистэ.
— Биһиги тэрилтэбит бу сылларга коммунальнай хаһаайыстыба үлэһиттэрин оҕолорун сынньатыыга күүскэ үлэлээтэ. Маныаха биһиэхэ СӨ Үөрэҕин министиэристибэтэ уонна “Полярные авиалинии” АК каассаларын филиала (В.В.Ксенофонтова) өрүү күүс-көмө буолалларын иһин махтанабыт. Үлэһиттэрбит ыытыллар фестивалларга, спартакиадаларга көхтөөхтүк кытталларыттан астынабыт, — диэтэ Сергей Анисимов.
Женни СТРЮКОВА, “Саха сирэ” хаһыат, http// www.edersaas.ru/