Бүгүн, ыам ыйын 29 күнүгэр, Ил Дархан Айсен Николаев 1218 №-дээх ыйааҕынан өрөспүүбүлүкэ биллиилээх уопсастыбаннай-бэлитиичэскэй диэйэтэлэ Роман Брызгалов аатын өрөспүүбүлүкэтээҕи Транспортнай тиэхиньукумҥа иҥэрдэ.
edersaas.ru
Аҕа дойду Улуу сэриитин кыттыылааҕа, Саха АССР Верховнай Сэбиэтин түөрт төгүллээх дьокутаата, Саха АССР норуотун хаһаайыстыбатын үтүөлээх үлэһитэ, ССРС профтехүөрэхтээһинин туйгуна, Мэҥэ Хаҥалас уонна Өймөкөөн улуустарын бочуоттаах гражданина, Индигир бочуоттаах бэтэрээнэ Роман Иванович Брызгалов-Абытай Арамаан уһулуччу талааннаах салайааччы быһыытынан биллэр. Саҥа олоҕу тутууну, холхуостааһыны, Аҕа дойду улуу сэриитин этинэн-хаанынан билбит киһи этэ.
Кини ураты тэрийэр талаана, салайар дьоҕура 1964 сыллаахха Саха сирин профтехүөрэхтээһинин управлениетын салайааччытынан ананыаҕыттан арыллыбыта. Бу кэмнэр усталарыгар өрөспүүбүлүкэҕэ протехүөрэхтээһин атаҕар туруутугар, материальнай-техническэй баазата бөҕөргүүрүгэр, үөрэх хаачыстыбата үрдүүрүгэр сүҥкэн кылаатын киллэрбитэ. Билигин кини тэрийбит управлениета өрөспүүбүлүкэ биир бөдөҥ дэпэртээмэнигэр тиийэ үүннэ.
Роман Брызгалов Өймөкөөн оройуонугар райсовет бэрэссэдээтэлинэн үлэлии олорон, алын сүһүөх профессиональнай-техническэй үөрэхтээһин управлениета аһыллыбытыгар үлэлии кэлэригэр Саха сиригэр түөрт эрэ училище баара. Бу үөрэх кыһалара Иркутскай уобалас управлениетын салалтатынан үлэлииллэрэ. Роман Иванович кэллэ кэлээт, профессиональнай үөрэхтээһин кыһаларын материальнай- финансовай хааччыллыыларын быһаарбыта. Кини үлэлиир кэмигэр училищелар ахсааннара 20-чэ буолбута.
Өрөспүүбүлүкэ орто анал үөрэхтээһинин тэрилтэлэрэ сайдыыларыгар, кэҥииллэригэр сүҥкэн кылааты киллэрбит үтүөтэ-өҥөтө Улуу Кыайыы 75, Ийэ дойдуга бэриниилээх буолуу сылларыгар сөптөөхтүк сыаналанан, фронтовик, сатабыллаах салайааччы Роман Брызгалов аата Мэҥэ Хаҥалас улууһун Аллараа Бэстээҕэр тахсыылаахтык үлэлии турар Транспортнай тиэхиньукумҥа иҥэриллибитин кини биир дойдулаахтара — мэҥэлэр айхаллыы көрүстүлэр.
«Ытыктабыллаах биир дойдулаахпыт, мэҥэлэр тумус туттар киһибит Роман Брызгалов-Абытай Арамаан аатын үөрэхтээһин биир кэскиллээх кыһатыгар иҥэриигэ өйөбүллэрин иһин улууспут дьаһалтатыгар, Транспортнай тиэхиньукум кэлэктиибигэр, Бүтэйдээх нэһилиэгин олохтоохторугар, чуолаан Константин Родионовка, Мэҥэ Хаҥалас уонна Өймөкөөн улууһун уопсастыбанньыктарыгар, убаастабыллаах биир дойдулаахпыт дьиэ кэргэнигэр, ытыктыыр убайдарын аатын иҥэриигэ сүүрбүт-көппүт бырааттарыгар Платон Брызгаловка уонна Зиновий Игнатьевка барҕа махталбытын тиэрдэбит«, — диэн Мэҥэ Хаҥалас олохтоохторо социальнай ситимнэр нөҥүө махталларын тиэртилэр.
Үтүө киһи үлэлээн ааспыт олоҕо, үлэтигэр-хамнаһыгар сыһыана, орто анал үөрэхтээһин салаатын атаҕар туруорбут үтүөтэ-өҥөтө таба сыаналанан үйэтитилиннэ.
Елена ПОТОЦКАЯ, «Саха сирэ» хаһыат, edersaas.ru