РФ Үбү ааҕар, хонтуруоллуур уорганнарын дэлэгээттэрэ Дьокуускайга кэллилэр
Бүгүн Дьокуускайга дойду 13 эрэгийиэниттэн Арассыыйа муниципальнай уорганнарыгар үбү ааҕар, хонтуруоллуур балаата бэрэссэдээтэллэрэ, солбуйааччылара XVIII кэмпириэнсийэҕэ муһуннулар.
edersaas.ru
Үп-харчы муниципалитеттарга туохха туттуллубутун, ханна ороскуоттаммытын хонтуруоллуур дьон уопсай мунньахтарын Сахабыт сирин киин куоратыгар түбэһиэхчэ оҥорботулар. Дьокуускайдааҕы үбү ааҕар, хонтуруоллуур балаата быйыл 15 сыла буолла.
Муниципальнай үбү ааҕар, хонтуруоллуур уорганнар сойуустарын бэрэссэдээтэлэ Владимир Астафьев: «Өрөспүүбүлүкэ иһигэр табаары оҥорон таһаарыы сыл ахсын улаатан иһэр. Ол курдук, тыа хаһаайыстыбатын, олохтоох аһы-үөлү сайыннарыыга 2021 сылга диэри 10,5 миллиард солкуобай көрүллүбүтэ. Саха сиригэр аан бастаан сылга 28 туоннаттан тахса көмүс хостонно. Экэниэмикэ эйгэтигэр быраабы кэһиини сэрэтэргэ Дьокуускайга үбү ааҕар, хонтуруоллуур балаата үчүгэйдик ылсан үлэлиир», — диэн эттэ.
Күн бүгүн өрөспүүбүлүкэ 52 федеральнай бырайыакка кыттар, быйылгыттан 41 бырайыакка үлэлэһэр. Кэлэр үс сыл иһигэр нэһилиэнньэ олоҕун таһымын тупсарарга Саха сиригэр 65 миллиард солкуобай киириэхтээх.
СӨ бырабыыталыстыбатын бэрэссэдээтэлэ Владимир Солодов өрөспүүбүлүкэ экэнэмиичэскэй сайдыыга Уһук Илин куораттарыттан инники күөҥҥэ киэҥник хардыылыырын бэлиэтээтэ. «Муниципальнай уорганнар көрүллүбүт үбү харыстаан, тус сыалга тутталларыттан дьон-сэргэ олоҕун уйгута улахан тутулуктаах. Национальнай бырайыактар олоххо киирэн истэхтэрин аайы үп-харчы туохха, ханна туттуллара биллэр уонна өйдөнөр буолуохтаах. Манна өрөспүүбүлүкэ Счетнай балаатата ыкса үлэлэһиэ», — диэтэ кини.
Олохтоох былаас уорганнара үбү ааҕар, хонтуруоллуур уорган үлэһиттэрин кытта хайдах бииргэ үлэлэһэллэрин туһунан үс күннээх кэмпириэнсийэҕэ дьүүллэһиэхтэрэ. Федеральнай бүддьүөттэн кэлэр миллиардынан үбү тус сыалга туттарга туох үлэ ыытылларын кэпсэтиэхтэрэ.
Марианна Тыртыкова, «Саха сирэ», edersaas.ru