Сэтинньи 14 күнүгэр РФ Накаастабылы толорор федеральнай сулууспатын Саха сиринээҕи управлениетын “Белый медведь” диэн ааттаах анал этэрээтэ тэриллибитэ 26 сылын бэлиэтээтэ. Тэрээһиҥҥэ “спецназ” этэрээтэ шефтэһэр кадеттара уонна “Айыы кыһата” гимназия үөрэнээччилэрэ сырыттылар.
Управление начальнигын солбуйааччытын эбээһинэһин толорор Леонид Слобожанинов эҕэрдэ тылын кэнниттэн военизированнай эстафета саҕаланна. Оҕолор манна аптамааты ыһыыга уонна хомуйууга, пневматическай бэстилиэттэн 10 м ыраах турар сыалы ытыыга, канаат тардыһыытыгар уонна да атын көрүҥнэргэ күрэхтэстилэр.
Күрэс былдьаһыы кэнниттэн тэриллибит сэп-сэбиргэл быыстапкатыгар үөрэнээччилэр Макаров бэстилиэтин, Калашников аптамаатын, снайпер бэнтиэпкэтин тутан-хабан көрдүлэр. Бырааһынньыктааҕы тэрээһин эстафета кыттыылаахтарыгар грамоталары уонна сувенирдары туттарыынан, минньигэс аһылыгынан түмүктэннэ, оҕолор бэркэ астынан тарҕастылар. Бу туһунан УФСИН пресс-сулууспата иһитиннэрэр.
.
Вера Макаров
УФСИН пресс-сулууспатын хаартыскаҕа түһэриилэрэ.