Алгыстаах ыскамыайка уонна стелла. Оскуоланы бүтэрбиттэрэ 15 сылын выпускниктар уратытык бэлиэтээтилэр.
edersaas.ru
Академик Афанасий Чугунов аатынан Мэлдьэхси орто оскуолатын 2004 сыллаахха бүтэрбит үөрэнээччилэр быйыл 15 сылларын бэлиэтиир үбүлүөйдээх дааталарынан, үөрэммит кыһаларыгар, учууталларыгар махтанан, кэрэ-сиэдэрэй көстүүлээх стелла (кованнай) уонна ис сүрэхтэн тахсар истиҥ алгыстаах ыскамыайка бэлэхтээтилэр.
Бу стелла уонна ыскамыайка эскиистэрин СӨ норуодунай маастара Василий Андросов уруһуйдаата. Оттон тимиргэ уһааран, Маттаҕа Аркадий Сивцев чааһынай тэрилтэтэ оҥорон биэрдэ.
Стелла оскуола иннигэр туруоруллан, үөрүүлээхтик аһыллыытыгар “Ростик” сайыҥҥы лааҕыр оҕолоро кыттыыны ыллылар. Выпускниктар оскуола түмэлигэр харалла сытар альбому, математикаҕа үөрэппит кылаастарын салайааччыта Михаил Григорьев үлэтин, олоҕун кэпсиир матырыйааллары көрөн, сүргэлэрэ көтөҕүллэн, үөрэммит кэмнэрин туһунан оскуола оҕолоругар ахтан-санаан аастылар, оҕолор ыйытыыларыгар хоруйдаатылар.
Быйыл 15 сылларын, ити курдук, уратытык бэлиэтээбит выпускниктар, кинилэр бачыымнарын, саҕалааһыннарын атын да сыллардааҕы выпускниктар өйүөхтэрэ диэн эрэнэллэрин биллэрдилэр.
Надежда АНДРОСОВА, Мэлдьэхси
Мэҥэ Хаҥалас улууһа