Дьокуускай куорат баһылыга Сардана Авксентьева судаарыстыбаннай-чааһынай бииргэ үлэлэһии иитинэн тутуллубут саҥа социальнай эбийиэктэр үөрэх дьылыгар төһө бэлэмнэрин бэрэбиэркэлээтэ.
edersaas.ru
Баһылыгы кытта үлэ хаамыытын мэр солбуйааччыта Евгений Григорьев, үөрэх управлениетын начаалынньыгын эбээһинэһин толорооччу Екатерина Семенец, тутуу департаменын начаалынньыгын солбуйааччы Ньургун Пахомов, куорат уопсастыбаннай балаататын чилиэннэрэ билистилэр.
Бастакынан 500 миэстэлээх 6-с №-дээх уопсай үөрэхтээһин оскуолатын бэрэбиэркэлээтилэр. “ГазЭнергоМонтаж” ХЭУо генеральнай дириэктэрин солбуйааччы Андрей Урум иһитиннэрбитинэн, бары бэлиэтээһин болдьоҕор туоратыллар. “Кэккэ бэлиэтээһиннэри оҥорбуттара туолла да, тута отчуоттаан иһэбит. Бүгүҥҥү күҥҥэ оскуола миэбэлин таҥыы кыһалҕата быһаарыллар. Уон күн иһинэн миэбэли барытын таҥыахтаахпыт”, — диэн этэр Андрей Урум.
Салгыы оробуочай хамыыһыйа 275 миэстэлээх 35-с №-дээх саҥа инклюзивнай оскуола дьиэтигэр сырытта. Бэдэрээтчит – “Кинг-95” ХЭУо тутуу хампаанньата. Манна тутуу итэҕэстэрин-быһаҕастарын уонна дьиэги хамыыһыйа тута көрдө. Оскуола иһигэр сорох миэстэлэринэн ардах уутун бэлиэтэ хаалбыта, истиэнэтигэр хайдыы (трещина) баара көстөр.
“Спорт саалаҕа, көрүдүөргэ уонна кылаастарга тэстиини атырдьах ыйын 20 күнүгэр диэри көннөрүөхпүт” — диэн бэдэрээтчит тэрилтэ бэрэстэбиитэлэ этэр.
Куорат баһылыга Сардана Авксентьева сакаасчыт “Главстрой” уонна бэдэрээтчит “Кинг-95” тэрилтэлэргэ тутуу акылаатын кичэллээхтик чинчийэргэ сорудахтаата, оттон оскуола салалтатыгар бэдэрээтчит тэрилтэ үлэтин кытаанахтык хонтуруоллуурга эттэ.
Салгыы Сардана Владимировна “Айыы Кыһата” национальнай оскуоланы көрдө. Санатан эттэххэ, 550 миэстэлээх оскуола СӨ бырабыыталыстыбата, Дьокуускай куорат уокуругун дьаһалтата уонна “ГазЭнергоМонтаж” ХЭУо үс өрүттээх судаарыстыбаннай-чааһынай бииргэ үлэлэһиигэ сөбүлэҥнэрин чэрчитинэн тутуллубута. “Бу эбийиэккэ тиэхиньиичэскэй үлэлэртэн ууну ыраастыыр уонна миэбэли оннугар туруортуур хаалла. Сүрүн үлэтэ бүппүтэ”, — диэн Андрей Урум этэр.
Оробуочай бөлөх салгыы эмиэ “ГазЭнергоМонтаж” ХЭУо туппут “Цветик-семицветик” уһуйааҥҥа сырытта.
Социальнай эбийиэктэри бэрэбиэркэлээһин түмүгэр, баһылык Сардана Авксентьева 35-с нүөмэрдээх инклюзивнай оскуолаҕа үгүс итэҕэс баарын бэлиэтээтэ. “Тиэхиньиичэскэй итэҕэһи атырдьах ыйын 20 күнүгэр диэри туоратарга диэн болдьохтонно. Биһиги сүрүн сорукпут – оҕоҕо куттал суох буолуутун хааччыйыы. Онон бары боппуруос үлэ бэрээдэгинэн быһаарыллыаҕа. Аны 10 күнүнэн хаттаан бэрэбиэркэлиэхпит”, — диэн эттэ.
Атырдьах ыйын 9 күнүгэр бырайыактыыр, бэдэрээтчит тэрилтэлэри итиэннэ Дьокуускай куорат уокуругун дьаһалтатын бары тутулуктаах салаалара кыттыылаах үөрэх саҥа тэрилтэлэрин салайааччыларын мунньаҕын ыытарын туһунан иһитиннэрдэ.
Дьокуускай куорат уокуругун дьаһалтатын уопсастыбаннаһы уонна СМИ-ни кытта үлэҕэ департамена.