Рассадин, Александров – норуоттар икки ардыларынааҕы турнир кыайыылаахтара

Бу күннэргэ Нефтеюганскай куоракка Ханты-Манси уокуругун Думатын дьокутаата, Арассыыйа спортивнай тустууга федерациятын вице-бэрэсидьиэнэ Владимир Семенов бирииһигэр көҥүл тустууга XIV норуоттар икки ардыларынааҕы турнир түмүктэннэ.

Нефтеюганскай көбүөрүгэр Саха сириттэн биэс бөҕөс туһунна – өрөспүүбүлүкэ сүүмэрдэммит хамаандатын хапытаана Виктор Рассадин, норуоттар икки ардыларынааҕы кылаастаах спорт маастара Ньургун Александров, Арассыыйа икки төгүллээх призера Арыйаан Тютрин, Роман Дмитриев кэриэһигэр норуоттар икки ардыларынааҕы турнир кыайыылааҕа Георгий Кычкин уонна Арассыыйа чөмпүйүөнэ Егор Пономарев.

57 киилэҕэ диэри ыйааһыҥҥа кыайыылааҕы быһаарар түмүк хапсыһыыга Ньургун Александров Расул Машезовы 6:2 ахсаанынан баһыйа тутта.

65 киилэлээхтэргэ Виктор Рассадин байыаннайдар ортолоругар аан дойду чөмпүйүөнэ Начыын Куулары илиилээх-атахтаах оҥорбото, 11:0 ахсаанынан хотто. Бу ыйааһыҥҥа боруонса мэтээли былдьаһар күөн көрсүһүүгэ Арыйаан Тютрин биир дойдулааҕын Георгий Кычкины кыайда.

61 киилэҕэ диэри ыйааһыҥҥа Егор Пономарев бастаан Азамат Ходовка хоттордо. Онтон, Ходов финалга тахсыбытынан, салгыы тустар быраабы ылан, Турция бөҕөһө Чингизхан Эрдогаҥҥа сабырыйтарда. Спорду сэҥээрээччилэр «Чингизхан Эрдоган» диэн аатынан Европа үс төгүллээх чөмпүйүөнэ Опан Сат тустарын билэр буолуохтаахтар. Бу ыйааһыҥҥа силгэ эпэрээссийэтин кэнниттэн чөлүгэр түһэн эрэр Александр Богомоев кыахтаахтык бастаата.

Владимир Семенов бирииһигэр көҥүл тустууга норуоттар икки ардыларынааҕы турнир кыайыылаахтара:

57 кг диэри ыйааһыҥҥа

1. Ньургун Александров (Арассыыйа)
2. Расул Машезов (Арассыыйа)
3. Арыйан Тютрин (Арассыыйа), Махир Амирасланов (Азербайджан)

61 кг диэри ыйааһыҥҥа

1. Александр Богомоев (Арассыыйа)
   2. Азамат Ходов (Арассыыйа)
   3. Шамиль Омаров (Арассыыйа), Чингизхан Эрдоган (Турция)

65 кг диэри ыйааһыҥҥа

1. Виктор Рассадин (Арассыыйа)
2. Начын Куулар (Арассыыйа)
3. Абдула Ахмедов, Абакар Абасгаджиев (иккиэн Арассыыйаттан)

70 кг диэри ыйааһыҥҥа

1. Исраил Касумов (Арассыыйа)
   2. Заурбек Сидаков (Арассыыйа)
   3. Ильдус Гиниатуллин (Арассыыйа), Анзор Закуев (Арассыыйа)

74 кг диэри ыйааһыҥҥа

1. Евгений Лапшов (Арассыыйа)
2. Славик Наниев (Арассыыйа)
3. Ацамаз Санакоев (Арассыыйа), Болат Сакаев (Казахстан)

86 кг диэри ыйааһыҥҥа

1. Александр Гостиев (Азербайджан).
   2. Заур Макиев (Арассыыйа)
   3. Артур Найфонов (Арассыыйа), Батырбек Цакулов (Арассыыйа)

97 кг диэри ыйааһыҥҥа

1. Юрий Белоновскай (Арассыыйа)
2. Георгий Гогаев (Арассыыйа)
3. Чермен Хубалов (Арассыыйа), Эрик Тилле (Германия)

125 кг диэри ыйааһыҥҥа

1. Алан Хугаев (Арассыыйа) 2. Заур Козонов (Арассыыйа) 3. Сослан Хинчагов (Арассыыйа), Ацамаз Газзаев (Арассыыйа)

Роман Попов, “Саха сирэ” хаһыат

Хаартыска Интэриниэттэн ылылынна.