Өрөспүүбүлүкэтээҕи онкодиспансер онлайн эрэсиимининэн улуус балыыһаларыгар сүбэ биэрэр

Өрөспүүбүлүкэтээҕи онкодиспансер улуус балыыһаларыгар методическай, практическай көмөнү оҥорор үлэтин салгыыр. Иллэрээ күн Үөһээ Бүлүү, Бүлүү, Горнай, Кэбээйи, Ньурба, Сунтаар улууһун балыыһаларын кытары быһа сибээһинэн үлэлээтилэр. 

Сүбэ мунньахха нэһилиэнньэҕэ көмөнү оҥоруу туругун ырытан көрдүлэр, үлэ-хамнас хардыытын, ыарахан ыарыһахтар хойутаан биллиилэрин быһаарыстылар. Аһаҕас кэпсэтии быһыытынан ыытыллыбыт мунньахха улуус балыыһаларын исписэлиистэрэ өрөспүүбүлүкэ сүрүн онколог-быраастарыгар ыйытыылары биэрдилэр.

Түмүккэ, көмөнү оҥоруу хаачыстыбатын үрдэтэргэ сүбэлэр бэрилиннилэр, ый аайы үлэ ыытылларын, нэһилиэнньэ диспансеризацияны барарын,  искэн ыарыытын эрдэ быһаарар туһуттан өйдөтөр-сүбэлиир үлэни күүскэ тэрийэр, бырааска кэмигэр көрдөрөр, диспансер баазатыгар исписэлиистэри үөрэтиини тэрийэр, о.д.а. туһунан кэпсэттилэр.

Алтынньы ый устатыгар маннык хабааннаах үлэ атын улуустарга эмиэ ыытыллара былааннанар.