Өрөспүүбүлүкэ волонтердарын куорпуһа Дьокуускай куоракка уонна улуустарга өрөбүлэ суох үлэлиир.
Бүгүҥҥү туругунан өрөспүүбүлүкэ үрдүнэн 938 сайаапка киирбититтэн 908 туолла. Киирбит сайаапканы суукка иһинэн толороллор.
Дьокуускай куоракка өрөбүл күннэригэр куорпуска көмөлөһөн, бырабыыталыстыбаттан икки массыына сүүрэ сылдьар. Ону таһынан, волонтердар икки тус массыыналара баар.
Өрөспүүбүлүкэтээҕи волонтердар куорпустарын бэрэссэдэтээлэ Александр Сусоев иһитиннэрбитинэн, Дьокуускай куорат дьаһалтата 90 волонтеру уопсастыбаннай тырааныспарга сылдьарга босхо бырайыаһынан, оттон ХИФУ уонна “Көмүлүөк” саха иһитин оҥорор хапмаанньа волонтердары босхо маасканан хааччыйдылар. “Билайн” сибээс тэрилтэтэ сүүстүү солкуобайы уган туран, 100 симкартаны волонтердарга түҥэппит. “Шашлыкофф” гриль-бар күн аайы 20 волонтеру босхо аһатар. «Айгуль» гипермаркет, “Ранчо” маҕаһыын уонна “Котенко” чааһынай тэрилтэ табаардарын сыанатын чэпчэттилэр.
Өрөспүүбүлүкэтээҕи волонтердар куорпустара «Дьиэ-кэргэн уонна ыччат социальнай-психологическай өйөбүлүн” киинигэр Дьокуускайга Каландаришвили уулусса 21-с нүөмэригэр баар. Билигин куорпуска барыта 1 680 волонтер үлэлиир. Саамай элбэх волонтер Уус Алдан улууһугар (140 киһи) баар, онтон үгүс сайаапка ( 283 ) Дьокуускай куораттан киирбит.
Көмөҕө наадыйар дьон бу нүөмэргэ +7(800)-200-34-11 күнүстэри-түүннэри эрийиэххитин сөп. Сарсыарда 9 чаастан киэһэ 19 чааска диэри +7 (914)-296-65-47, +7 (914)-237-61-04, +7 (914)-237-61-39 нүөмэрдэргэ сайаапкаларгытын хаалларыҥ.
Волонтер буолуон баҕалаахтар www.мывместе2020.рф саайтка суруйан эбэтэр 7-914 229 0954 нүөмэргэ эрийэн билсиҥ.
Ньургуйаана Иванова, “Саха сирэ” хаһыат, edersaas.ru