Бу туһунан бүгүн, олунньу 18 күнүгэр, борокуратуура уорганнарын киэҥ ыҥырыылаах коллегияларын мунньаҕар иһитиннэрдилэр. Манна борокуруордар 2018 сыллааҕы үлэлэрин ырытыстылар, быйылгы соруктарын торумнастылар.
2016 сыл муус устар ыйыттан өрөспүүбүлүкэ борокуруорунан ананан үлэлээбит Николай Пилипчук бу дьыл олунньу 8 күнүттэн дуоһунаһыттан босхолонон, Приморскай кыраай борокуруорунан ананан барбыта. Инньэ гынан, коллегия мунньаҕын өрөспүүбүлүкэ борокуруорун эбээһинэһин быстах кэмҥэ толорор Айдар Иванов салайан ыытта, сүрүн дакылааты кини оҥордо.
Коллегия мунньаҕар РФ Генеральнай борокуруорун Уһук Илиҥҥи уокурукка солбуйааччыта Игорь Ткачев, өрөспүүбүлүкэ баһылыга Айсен Николаев, быраабы араҥаччылыыр уорганнар салайааччылара, улуустар борокуруордара кытыннылар.
Айдар Иванов иһитиннэрбитинэн, ааспыт 2018 сылга борокуруордар дьон быраабын көмүскээн, 64 тыһыынчаттан тахса сокуону кэһиини булбуттар, ылбыт миэрэлэрин түмүгэр 11 тыһыынчаттан тахса киһи эппиэтинэскэ тардыллыбыт, борокуруордар бэрэбиэркэлэрин түмүгэр 175 холуобунай дьыала тэриллибит.
Сүрүн болҕомто хамнаска иэһи төлөттөрүүгэ ууруллан, бу эйгэҕэ 9 тыһыынчаттан тахса кэһиини булан, 6 тыһыынчаттан тахса үлэһит быраабын көмүскээбиттэр, 6 холуобунай дьыала тэриллибит. Маныаха былаас уорганнарын кытта бииргэ үлэлээһин түмүгэр, 242 мөлүйүөн солкуобай хамнаска иэһи төлөттөрөрү ситиспиттэр.
Хоруупсуйаны утары охсуһуу хайысхатынан, 2,5 тыһыынчаттан тахса сокуону кэһии чахчыта булуллубут. Борокуратуура көҕүлээһининэн, 24 холуобунай дьыала тэриллибит. Быраабы араҥаччылыыр уорганнары кытта биир сүбэнэн үлэлээһин түмүгэр, бу эйгэҕэ уопсайа 144 буруйу оҥоруу бэлиэтэммит.
Ааспыт 2018 сылга өрөспүүбүлүкэҕэ 11 936 буруйу оҥоруу бэлиэтэммит, ол 2017 сыллааҕыттан 3,7 %-нан аҕыйах. 11,7 %-нан киһи баайын-малын утары туһуламмыт буруй, 7,7 %-нан сокуоннай саастарын ситэ илик оҕолор буруйу оҥоруулара аҕыйаабыт.
Буруйу арыйыы 67,2 %-тан 72, 8 %-ҥа диэри үрдээбит.
Биһиги корр., «Саха сирэ» хаһыат, edersaas.ru
Хаартыскалар: ааптар уонна СӨ Борокуратууратын пресс-сулууспатын түһэриилэрэ.