Үөрүүлээх сонун: Ньурбаҕа тыйаатыр тутуллар
Олох-дьаһах

Үөрүүлээх сонун: Ньурбаҕа тыйаатыр тутуллар

«Култуура» национальнай бырайыагынан Ньурбаҕа дыраама тыйаатыра тутуллан эрэр.

СӨ Култуураҕа министиэристибэтэ иһитиннэрбитинэн, саҥа тыйаатыр икки мэндиэмнээх, 250 киһи киирэр саалалаах буолуохтаах. Тутуу үлэтэ күргүөмнээхтик, өрө көтөҕүллүүлээхтик саҕаламмыт.
Ньурба оройуонунааҕы инвестиционнай-тутуу управлениетын начаалынньыга Макар Семёнов иһитиннэрбитинэн, пандемия кыра харгыстары үөскэтэ сылдьыбыт. Ол эрээри, икки нэдиэлэ анараа өртүгэр тутааччылар үлэлиирдии турунан, оҥостон кэлбиттэр. Үлэ-хамнас тэтимин билигин ылбыт.
—Бу үлэҕэ олохтоох уон эдэр ыччат баар, ол аата, кинилэр төрөөбүт сирдэригэр-уоттарыгар тыйаатыры тутуһаллар. Көҥдөйүн «РДР-групп» ХЭУо быйыл бүтэриэхтээх», — диэбит.
Тутуу 2021 сыл күһүн түмүктэниэхтээх, тыйаатыр онно саҥа премьераны көрдөрөр былааннаах.  Ньурба тыйаатыра быйыл 55 театральнай сезона. Щепкин аатынан театральнай устьуудьуйа 17 выпускнига Ньурбаҕа үлэлии тиийиэҕттэн, тыйаатыр устуоруйата саҕаланар. Бу тыйаатыр билигин 1966 сыллаахха тутуллубут биир этээстээх мас дьиэҕэ баар. Эргэ тутуу баһаарынай ирдэбилгэ эппиэттээбэт, иҥнэйбит, өрөмүөн кыайан ыытыллыбат. Онон тыйаатыр кэлэктиибэ уонна куорат олохтоохторо саҥа тыйаатыр дьэндэйэн тахсарын долгуйа күүтэллэрэ кэмнээх буолуо дуо?!
—Ньурба тыйаатыра аһыллыаҕыттан сүгүрүйээччи буоларым быһыытынан, бэйэлэрэ бас билэр аныгы  дьиэлэнэллэриттэн олус үөрдүм.  Бэртээхэй испэктээктэри астына көрүөхпүт, тэрээһиннэр ыытыллыахтара, — диэн Ньурба олохтооҕо Елизавета Прокопьева санаатын үллэстибит.
0
0

Сайт матырыйаалларын ааптар көҥүлэ суох ылар бобуллар.

Ваш e-mail не будет опубликован.

пять × пять =