Үөрүүлээх сонун: «Дьырыбына Дьырылыатта» Театральнай олимпиадаҕа кыттыаҕа

Санкт-Петербург куораттан бу күннэргэ үөрүүлээх сонуну туттубут.

Ол курдук, Театральнай олимпиада аан дойдутааҕы кэмитиэтин чилиэнэ, Александринскай тыйаатыр уус-уран салайааччыта Валерий Владимирович Фокин Олоҥхо тыйаатырын «Дьырыбына Дьырылыатта» испэктээгинэн 2019 сылга, алтынньы ыйга, Санкт-Петербурга ыытыллыахтаах Театральнай олимпиадаҕа кыттарыгар ыҥырыы сурук ыытта. 

Чопчулаан эттэххэ, Театральнай олимпиада  1993 сыллаахха Грецияҕа Дельфа куоракка тэриллибитэ. Онтон ыла Японияҕа,  Россияҕа, Турцияҕа, Соҕуруу Кореяҕа, Кытайга, Польшаҕа, Индияҕа ыытыллыбыттара.  Олимпиада бырагырааматыгар үлэлэһэргэ  ааттаах-суоллаах ускуустуба диэйэтэллэрин, корифейдарын сэргэ,  экспериментальнай тыйаатыр тахсан эрэр сулустарын киэҥ араҥатын  хабарга сорук турар эбит. Театральнай олимпиаданы ыытыы уонна онно кыттыы хайа баҕарар дойду театральнай ускуустубатын историятыгар умнуллубат түгэн буолар.  

  Олоҥхо тыйаатырын пресс-сулууспатыттан Майя ВЛАСЬЕВА,

«Саха сирэ» хаһыат, edersaas.ru саайтыгар анаан