Путин премьер-миниистир дуоһунаһыгар Мишустин кандидатуратын киллэрдэ...
· - Бэлиитикэ - Бэлиэ күннэр

Путин премьер-миниистир дуоһунаһыгар Мишустин кандидатуратын киллэрдэ

Бэҕэһээ, тохсунньу 15 күнүгэр, Арассыыйа бырабыыталыстыбата астаапкаҕа барда. Премьер-миниистир Дмитрий Медведев астаапка туһунан иһитиннэрдэ. Бэрэсидьиэн бырабыыталыстыбаҕа саҥа кэбиниэт таҥыллыар диэри бэйэлэрин эбээһинэстэрин толороллоругар сорудахтаата. Путин Медведевы куттал суох буолуутун сэбиэтин баһылыгын солбуйааччынан аныаҕа.
Арассыыйа Бэрэсидьиэнэ Владимир Путин Судаарыстыбаннай Дуумаҕа бырабыыталыстыба бэрэссэдээтэлин дуоһунаһыгар хандьыдааты киллэрдэ. Бу — Федеральнай нолуок сулууспатын тойоно Михаил Мишустин.

Дойду баһылыга Мишустины кытта оробуочай көрсүһүү оҥордо, онно киниэхэ каадырга сыһыаннаах этии киллэрдэ, диэн Кремль пресс-сулууспата иһитиннэрэр. Мишустин маныаха сөбүлэстэ, онтон Владимир Путин кини кандидатуратын парламент аллараа палаататын көрүүтүгэр киллэрдэ.
Мишустин диэн кимий?
Михаил Владимирович Мишустин 1966 сыллаахха кулун тутар 3 күнүгэр Москва куоракка күн сирин көрбүтэ.
1989 сыллаахха Москватааҕы станкоинструментальнай институкка (билигин “Станкин” Москватааҕы судаарыстыбаннай технологическай университет) “автоматизированнай бырайыактааһын тиһиктэрэ” идэни бүтэрбит. 1992 сыллаахха – бу институт аспирантуратын.
Экэниэмикэ наукатын дуоктара.
1992-1995 сс. – Норуоттар икки ардыларынааҕы компьютер кулуубун тестовай лабораториятын дириэктэрэ, 1995-1996 сылларга – Норуоттар икки ардыларынааҕы компьютер кулуубун генеральнай дириэктэрин солбуйааччы, бу кулууп бырабылыанньатын бэрэссэдээтэлэ.
1998 сыл атырдьах ыйыгар Арассыыйа Судаарыстыбаннай нолуокка сулууспатын салайааччытын солбуйааччынан анаммыта. 1999 сыл кулун тутартан 2004 сыл кулун тутарга диэри Арассыыйа Федерациятын Нолуокка уонна хомуурдарга миниистирин солбуйааччынан үлэлээбитэ.
2004 сыл кулун тутартан 2006 сыл ахсынньы ыйыгар диэри Хамсаабат баай-дуол эбийиэктэрин кадаастырын федеральнай агентствотын салайбыта.
2007 сыл тохсунньу ыйыттан 2008 сыл кулун тутар ыйыгар диэри Ураты экономическай зоналары салайыыга федеральнай агентствоны салайбыта. 2008 сыл кулун тутар ыйыгар UFG («ОФГ Инвест») хампаанньалар бөлөхтөрүн бэрэсидьиэнэ – Арассыыйаҕа үлэлиир активтары, быһаччы инвестициялары, ону тэҥэ Deutsche Bank кытта бииргэ паайдаах инвестиционнай пуондалары салайыы эйгэтигэр бөдөҥ хампаанньалартан биирдэстэрин бэрэсидьиэнинэн буолбута.
2010 сыл муус устар 6 күнүттэн Арассыыйа Бырабыыталыстыбатын Бэрэссэдээтэлин 507-р №-дээх “Федеральнай нолуок сулууспатын салайааччытын туһунан” дьаһалынан Федеральнай нолуок сулууспатын салайааччынан анаммыта.
Судаарыстыбаннай нолуок администрированиетын иһитиннэрэр-технологическай ньымаларын уонна баайга-дуолга нолуок администрированиетын иһитиннэрэр-технологическай төрүттэрин туһунан монография ааптара.

РИА Новости хаартыската
Кира Латухина тэикиһэ, “Российская газета”хаһыаттан

Бэлэмнээтэ Женни Стрюкова

0
0

Сайт матырыйаалларын ааптар көҥүлэ суох ылар бобуллар.

Ваш e-mail не будет опубликован.

семнадцать − 5 =