Бу күннэргэ Быыбар киин хамыыһыйата Владимир Путин итэҕэллээх дьонун регистрациялаата. Бастакы испииһэккэ 259 киһи киирдэ. Ол иһигэр Саха сириттэн “Анаабыр алмаастара” генеральнай дириэктэрэ Павел Маринычев уонна Эстрада театрын дириэктэрэ Алексей Егоров. edersaas.ru
Санатан эттэххэ, президент быыбарыгар кыттар кандидаттар 600 киһиэхэ тиийэ итэҕэллээх дьону регистрациялыыр бырааптаахтар. Владимир Путин ааспыт быыбарга 499 итэҕэллээх киһилээх этэ. Быйылгы испииһэгэр урукку сылларга соччо улаханнык биллибэтэх-көстүбэтэх дьоннор киирдилэр.
Ол курдук, композитор Игорь Крутой, адвокат Анатолий Кучерена, ырыаһыттар Лев Лещенко, Денис Майданов, Полина Гагарина, Михаил Боярскай, Игорь Бутман, Эрмитаж дириэктэрэ Михаил Пиотровскай, “Комсомольская правда” хаһыат кылаабынай редактора Владимир Сунгоркин, артыыс Владимир Винокур, суруналыыстар Леонид Якубович, Александр Масляков о.д.а. ананнылар.
Регистрацияны ааспыт итэҕэллээх дьоннор аҕытаассыйаны ыыталларын таһынан, өскөтүн кандидат бэйэтэ кыайан кэлбэт түгэнигэр, дебакка кыттыахтарын сөп. 2012 с. буолбут быыбарга Владимир Путин оннугар итэҕэллээх дьонноро дебакка кыттан тураллар.
Владимир Путин ыстаабын Дмитрий Рогачев аатынан медицина киинин дириэктэрэ, Оҕолор гематологтарын уонна онкологтарын национальнай уопсастыбатын салайааччыта, медицинскай наука доктора, профессор, Россия наукатын академиятын академига Александр Румянцев, талааннаах оҕолор “Сириус” диэн кииннэрин салайааччыта, социологическай наука кандидата Елена Шмелева уонна “КамАЗ” генеральнйа дириэктэрэ (автособуоту 2002 с. салайар, бу иннинэ Татарстаҥҥа премьер-миниистир солбуйааччынан үлэлээбитэ) Сергей Когогин салайыахтара. Ыстаап пресс-сэкирэтээринэн ВГТРК сырдатааччыта, “Крым. Путь на родину” киинэ ааптара Андрей Кондрашов ананна.
Владимир Путины сэргэ бу күннэргэ Владимир Жириновскай (ЛДПР) уонна Григорий Явлинскай (“Яблоко”) итэҕэллээх дьоннорун регистрациялаатылар.
Быыбар киин хамыыһыйатыгар билиҥҥитэ икки кандидат, Владимир Жириновскай уонна Павел Грудинин (КПРФ) регистрацияны аастылар. Онтон атыттар илии баттааһынын хомуйа сылдьаллар. Хомуйуу тохсунньу 31 күнүнэн түмүктэниэҕэ.
Ыспыраапка:
Павел Маринычев – 2016 с. “Анаабыр алмаастара” хампаанньа генеральнай дириэктэринэн анаммыта.
Кини 1978 с. Дьокуускайга төрөөбүтэ. Новосибирскайдааҕы экономика уонна салайар академияны, Нефть уонна гаас институтун үөрэнэн бүтэрбитэ. Үлэтин 2000 с. СӨ оттугун уонна энергетикатын министиэристэбиттэн саҕалаабыта. 2001 с. СӨ Реионнааҕы энергетическай хамыыһыйатыгар үлэлии киирбитэ. Манна исписэлиистэн судаарыстыбаннай кэмитиэт бэрэссэдээтэлин солбуйааччытыгар тиийэ үүммүтэ. 2005-2010 сс. – “Сахатранснефтегаз” хампаанньа генеральнай дириэктэрин бастакы солбуйааччынан үлэлээбитэ. 2010 с. бырабыыталыстыба бэрэссэдээтэлин солбуйааччынан анаммыта.
Алексей Егоров – СӨ эстрадатын театрын дириэктэрэ, режиссер, продюсер, СӨ култууратын туйгуна.
2014 с. “Бастыҥ бырайыак” номинацияҕа СӨ президенин гранын кыайыылааҕынан буолбута. “Сахафильм” тэрилтэҕэ киинэ устар комплекс начальнигынан үлэлээбитэ. “Десант-энтертеймент” ХЭТ салайааччыта. Кини салайыытынан 16 уус-уран киинэ уһуллубута.
2015 с. Эстрада театрын дириэктэринэн анаммыта.
Аграфена КУЗЬМИНА, “Саха сирэ” хаһыат, edersaas.ru