Мэҥэ Хаҥалас улууһун Хочо бөһүөлэгэр поэзияны сөбүлүүр айар куттаах дьон аҕыйаҕа суох. Нуучча тылын уонна литературатын учуутала Елена Петровна Прокопьева үйэ чиэппэрин устата Литературнай салону үлэлэппитэ. Салон иһинэн литературнай биэчэрдэри, поэзия чаастарын ыытар этилэр.
edersaas.ru, Елена Прокопьева
Маныаха араас идэлээх дьон, ыччаттар, оскуола оҕолоро нуучча, саха поэттарын хоһооннорун ааҕаллара. Салон үлэтигэр ветбыраас Татьяна Исаковна Сидорова, почта үлэһитэ Оксана Викторовна Лонгинова, уһуйаан иитээччитэ Клавдия Семеновна Ларионова, кулууп үлэһитэ Мелания Федоровна Анисимова, электрик Олег Петрович Платонов, 60-н ааһан баран ааптар буолбут Варвара Семеновна Кириллина уо.д. а кыттыбыттара.
Билигин салон үлэтин саҥалыы тыыннаан “Хоһоон хонуута” түмсүү тэрийэн үлэлэтэ сылдьар олохтоох бибилэтиэкэр Ирина Дмитриевна Никанорова. Түмсүүгэ уонтан тахса кэрэ аҥаардар хоһоон ааҕыытынан уонна нуучча поэттарын айымньыларын сахалыы тылбаастааһынынан дьарыктаналлар. Сылын аайы Кыайыы күнүгэр буойун поэттар хоһооннорун ааҕабыт, бэтэрээн-саллаат Дмитрий Антонович Никаноров кэриэһигэр анаммыт “Кыайыыны уруйдуур хоһооннор” күрэскэ кыттабыт. Бырайыак ааптардара – эдьиийдии-балыстыы Ирина, Наталья Никаноровалар.
Өссө Литсалон саҕаттан олохтоммут үгэстээхпит – ол А.С.Пушкин 200 сыллаах үбүлүөйүттэн саҕалаан, бэс ыйын 6 күнүгэр поэзияны таптааччылар мустан, улуу поэт хоһооннорун ааҕабыт, тылбаастыыбыт.
Быйыл Александр Пушкин 220 сыллаах үбүлүөйүн поэт пааматынньыгын аттыгар Дьокуускайга, Нуучча тыйаатырын иннигэр бэлиэтээтибит. Пааматынньык таһыгар туран хоһооннорун аахтыбыт, тылбааска холонуулары иһиттибит. Биһиги ыраахтан кэлэн үбүлүөйдээх тэрээһиҥҥэ кытта сылдьарбытын көрөн, дьон сэҥээрдэ, тэрийээччилэр Пушкин кинигэлэрин бэлэхтээтилэр. Онон кэрэ эйгэҕэ кыттыһан, астынан, тутум үрдээн тарҕастыбыт.
Елена Прокопьева, Литсалон салайааччыта, “Хоһоон хонуута” түмсүү чилиэнэ, edersaas.ru саайтка анаан