Ахсынньы 21-22 күннэригэр Дьокуускайга “Дохсун” спортивнай комплекска «Нэһилиэк» бырайыак» уопсастыбыннай тэриллии экс-бэрэсидьиэн Егор Борисов бирииһигэр нэһилиэктэр икки ардыларынааҕы хапсаҕайы ыытыаҕа.
Күрэхтэһиигэ спорт маастардара, физкултуура үөрэҕин устудьуоннара, өрөспүүбүлүкэ сүүмэрдэммит хамаандатыгар киирэн күрэхтэспит уонна улуус кииннэрин, өрөспүүбүлүкэ куораттарын олохтоохторо кыттыбаттаh диэн балаһыанньалаах. Онон, нэһилиэккэ олохсуйбут эр дьон эрэ илин-кэлин түсүһүөхтэрэ.
Хамаандаҕа тоҕус киһи баар буолуохтаах: алта эр киһи (57, 65, 75, 95 уонна 95 киилэттэн үөһээ ыйааһыннарга) уонна үс 1979 сылтан эрдэ төрөөбүт бэтэрээннэр (60, 70 киилэҕэ диэри уонна 70 киилэттэн үөһээ ыйааһыннарга). Хамаанда күрэхтэһиигэ кыттарыгар 10 тыһ. солк. төлүүр.
Күрэхтэһии сүрүн бирииһэ — УАЗ-микроавтобус. Сайаапкалары ахсынньы 20 күнүгэр диэри hapsagai-nasleg2017@mail.ru электроннай аадырыска туталлар. Сиһилии 8964-427-74-45, +7 (914) 102-02-77 (Лев Новгородов) уонна 8914-100-33-80 (Софрон Попов) нүөмэрдэринэн билсиҥ.
Күрэхтэһии быһа биэриитин https://instagram.com/levnovgorodov84 көрүөххэ сөп.
Былырыын бу күрэхтэһии түмүгэр Хаҥалас улууһун Нөмүгү нэһилиэгин (баһылык Наум Устинов) бөҕөстөрүн хамаандата бастакы миэстэни ылан, анал куубагы сэргэ Егор Борисов туруорбут бирииһинэн — «УАЗ-микроавтобуһунан биһирэммиттэрэ. Үөһээ Бүлүү Кырыкый нэһилиэгэ (баһылык Сергей Сергеев) иккис буолбута. Үһүс бириистээх миэстэни Нам улууһун II Хомустаах нэһилиэгин (баһылык Лев Новгородов) хамаандата ылбыта.
edersaas.ru