Саха сирин үөрэнээччилэрэ «Правовые волонтеры» Бүтүн Арассыыйатааҕы күрэхтэһиигэ...
Олох-дьаһах

Саха сирин үөрэнээччилэрэ «Правовые волонтеры» Бүтүн Арассыыйатааҕы күрэхтэһиигэ ситиһиилэннилэр

Бүгүн Дьокуускайга Бүтүн Арассыыйатааҕы «Правовые волонтеры» күрэхтэһиигэ бириистээх миэстэни ылбыт хамаанданы чиэстээтилэр.

«Правовые волонтеры» күрэхтэһиигэ Дьокуускай куорат Н.О. Кривошапкин аатынан 5-с №-дээх оскуолатын онус кылааһын үөрэнээччилэрэ Саргис Назарян, Дайаана Саввинова, Дима Егоров, Арина Шадрина, Влад Маслов уонна Арина Сизых «Вестники добра» диэн хамаанданан кыттан үһүс миэстэни ситиһэн кэллилэр. Ситиһиилээх үөрэнээччилэри Саха сиригэр киһи быраабыгар боломуочуйалаах Сардаана Гурьева, СӨ Ыччат бэлиитикэтигэр уонна дьиэ кэргэн дьыалаларыгар миниистирэ Иван Луцкан, СӨ ИДьМ тус састаабы кытта үлэлиир управлениетын начальнигын солбуйааччы Лена Иванова эҕэрдэлээтилэр.

Хамаанда хамандыырынан 5-с №-дээх оскуола үөрэнээччитэ Саргис Назарян: «Драматургия права» номинацияҕа кыайаммыт «Көрөөччүлэр биһирэбиллэрэ» бирииһи ылбыппыт, онтон юридическай брейн-риҥҥэ, тургутукка, презентацияҕа ситиһиилэнэммит, уопсай ахсаанынан үһүс миэстэ буолан үөрэн-көтөн кэлэн турабыт. Хамаандабыт салайааччыбытынан оскуолабыт историяҕа учуутала, «Эрудит» кулууп салайааччыта Елена Николаевна Никонова буолар. Оттон Москваҕа онус «а» кылаас салайааччыта Ольга Васильевна Михайлова уонна  тэрийээччи регионнааҕы бэрэстэбиитэлэ Валентина Дамдиновна Николаева иилээн-саҕалаан илдьэ сырыттылар«, — диэн санаатын үллэстэр.

Саха сиригэр киһи быраабыгар боломуочуйалаах Сардаана Гурьева: «Оҕолор хас даҕаны түһүмэҕи ааһан, үөрэх дьыла арыллыаҕыттан — алтынньыттан ыам ыйыгар диэри улахан тургутууну баран бу күрэхтэһиигэ кыттан кэллилэр. Бастаан Саха сиригэр буолбут бастакы, иккис түһүмэхтэргэ кыттыбыттара. Онтон Арассыыйатааҕы сүүмэрдиир түһүмэҕи этэҥҥэ ааспыттара. Атын тэрээһиннэртэн уратыта диэн бу күрэхтэһиигэ кейстээх докумуоннары кытта үлэлэр, араас квестар ыытыллаллар. Бүтүн Арассыыйаттан күүстээх хамаандалар мустубуттар, хас даҕаны күннээх күрэхтэһии түмүгүнэн биһиги оҕолорбут үһүс миэстэни ыллылар. Бастакы — Сочи, иккис — Карелия хамаандалара буоллулар«, — диэн иһитиннэрдэ.

Манна даҕатан эттэххэ, «Правовые волонтеры» Арассыыйатааҕы таһымыгар Саха сирин хамаандата бастакытын кытынна. edersaas.ru

1
0

Сайт матырыйаалларын ааптар көҥүлэ суох ылар бобуллар.

Ваш e-mail не будет опубликован.

один × 1 =