Бу күннэргэ Саха сирин тустууну таптааччыларын биир долгутар түгэнинэн 61 киилэҕэ аан дойду чөмпүйэнээтигэр Россия чиэһин ким көмүскүүрүн быһаарар Егор Пономарев уонна Александр Богомоев икки ардыларыгар хапсыһыылара буолар.
Соторутааҕыта Россия көҥүл тустууга сүүмэрдэммит хамаандатын кылаабынай тренерэ Дзамболат Тедеев Дьокуускайга кэлэ сылдьан дойду чөмпүйүөнэ Егор Пономаревка төһө даҕаны Польшатааҕы турнирга хотторбутун үрдүнэн, сүрүн састаапка киирэригэр өссө биирдэ бэйэтин көрдөрөрүгэр кыаҕы биэрэрин туһунан эппитэ. Ол инниттэн үөрэтэр-эрчийэр түмсүү кэмигэр Александр Богомоевтыын киирсиитэ тэриллэрин ыйбыта. Ити тустууга ким кыайбыт – ахсынньы саҥытыгар Венгрия киин куоратыгар Будапешка ыытыллар, Олимпиада бырагырааматыгар киллэриллибэтэх ыйааһыннарга аан дойду чөмпүйэнээтигэр кыттыахтаах. Оттон 70 кг ыйааһыҥҥа Россия чиэһин осетин Заурбек Сидаков көмүскүө.
Ити санаа, өрөспүүбүлүкэ тустууну таптааччыларын сэргэхсиппитэ. Санаабытыгар, Пономарев-Богомоев быһаарыылаах киирсиилэрин күннэтэ күүппүппүт. Сири аннынан иһиттэххэ, киирсии сэтинньи 15 күнүгэр Сочига, Россия хамаандатын үөрэтэр-эрчийэр түмсүүтүн кэмигэр буолуохтаах этэ да, тоҕо эрэ бөҕөстөрү туһуннарбатахтара. Маныаха араас санаалар үөскүү сырыттылар. Бурятия спорка сайтыгар өссө, сахалар билигин Россия тустуутун кылаабынай спонсора АЛРОСА-нан туһанан, эмиэ Олимпиадаҕа курдук, бэйэлэрин уолларын аан дойду чөмпүйэнээтигэр быһа илдьэ бараары оҥостоллор диэн сымыйа санааны тарҕаттылар.
Сурах хоту иһиттэххэ, быһаарыылаах киирсии сэтинньи 25 күнүгэр ыытыллара иһиллэр. Өссө онно кимнээх судьуйалыахтаахтара быһаарыллыбыт, бөҕөстөр иккилии киилэ ордуктаах буолаллара көҥүллэммит. Билэргит курдук, бу иннинэ иллэрээ сыл Дьокуускайга ыытыллыбыт Россия чөмпүйэнээтин финалыгар Богомоев Пономареву 4:1 ахсаанынан кыайан турар. Ол эрээри, биһиги бөҕөспүт ааспыт ыйга улуу тренер Д.П.Коркин турнирыгар кыахтаахтык бастаан, үчүгэй тустар таһымыгар сылдьарын көрдөрбүтэ. Онон икки өттүттэн сытыы киирсиини күүтэбит уонна бэйэбит бөҕөспүтүгэр ыалдьабыт.
Петр ПАВЛОВ.