Сураҕа суох сүппүт дьону көрдөөһүн — полиция үлэтин биир сүрүн хайысхата. Бу күннэргэ Дьокуускай куорат полициятын үлэһиттэрэ сэттэ киһини, ол иһигэр, үс оҕону буллулар. Тыыннаахтар, этэҥҥэлэр эрээри, ханна сүтэ сылдьыбыттарый?
Ол курдук, СӨ ИДьМ-тын пресс-сулууспата иһитиннэрбитинэн, дьиэттэн тахсан баран сүтэн хаалбыт 65 саастаах таайын ирдэһэн, полицияҕа ыксаабыт кыыс кэлбит. Эр киһини суукка иһинэн булбуттар — бэйэтэ эппитинэн, куоракка муна-тэнэ сылдьыбыт.
16 саастаах уолларын сүтэрэн, долгуйан-айманан, оҕо төрөппүттэрэ полиция дьуһуурунай чааһыгар эрийбиттэр. Сокуоннай саастарын ситэ илик оҕолор дьыалаларыгар иниспиэктэрдэр уолу түөрт күнүнэн булбуттар — Мархаҕа табаарыстарыгар хоно-өрүү сылдьыбыт.
Игирэтин аҥаарын 32 саастаах киһи сүтэрбит. Убайын нэдиэлэ иһинэн булбуттар — тохтообокко арыгылыы сылдьыбыт.
Маны сэргэ, өссө түөрт киһини кылгас кэм иһигэр булбуттар. Полицияҕа бу дьон төрөппүттэрэ, кэргэттэрэ кэлбиттэр.
Дьон маннык сүтүүтэ үксүгэр, олоххо чэпчэкитик сыһыаннаһыыттан, итирдэр утахтарынан үлүһүйүүттэн, эппиэтинэһэ суох буолууттан тахсаллар.
Полиция сэрэтэр: өскөтүн чугас киһиҥ сүттэҕинэ, олорор сириҥ Ис дьыалаҕа отделыгар кэлэн, бэйэҥ докумуоҥҥун көрдөрөҕүн уонна сүппүт киһини туоһулуур докумуоннары аҕалаҕын.
Маныаха бу киһи тас көрүҥүн сиһилии, үчүгэйдик ойуулаан биэриэхтээххин, хаартыскатын илдьэ кэлиэхтээххин. Тугунан дьарыктанарын, майгытын-сигилитин, сыһыаҥҥытын, кимнээҕи кытта алтыһарын, ханна тиийиэн сөбүн — быһата, кини туһунан тугу билэргитин барытын ыраас мууска ууран биэрэҕит.
Быраабы араҥаччылыыр уорганнарга төһөнөн түргэнник биллэрэҕит да, соччонон сүппүт киһини көрдөөһүн суһаллык саҕаланар.
Маны таһынан: убаастабыллаах гражданнар! Бука диэн, ханна бараргытын-кэлэргитин чугас дьоҥҥутугар этэр буолуҥ, кинилэри долгутумаҥ, аймаамаҥ. Ордук чуолаан, оҕолоргутугар болҕомтоҕутун ууруҥ — уулуссаҕа, онно-манна төрөппүт хонтуруола суох сылдьан, буруйу оҥоруу сиэртибэтэ да буолуохтарын сөп биитэр бэйэлэрэ сокуону кэһиэхтэрин сөп.
Биһиги корр., «Саха сирэ» хаһыат, edersaas.ru
Хаартыска: интэриниэттэн.