Бу күннэргэ сыстыганнаах ыарыыга сутуллубут киһи ахсаана элбээн иһэр. Ол да иһин Ил Дархан Айсен Николаев дьиэҕэ олоруу эрэсиимин кэспэт туһунан брифинигэр анаан бэлиэтиир.
edersaas.ru
Төһө эмэ бобуу-сэрэтии бара турарын үрдүнэн, дьон тыаҕа күүлэйдии, шашлыктыы тахсар түбэлтэтэ үгүс. Ол иһин бу күннэргэ бэрээдэги араҥаччылыыр уорганнар үлэһиттэрэ тыаҕа тахсан, анал эриэйдэлэри ыытан эрэллэр.
«Вести-Саха» сонуннары биэрэ ханаал суруналыыстара биир оннук эриэйдэҕэ сылдьыбыт видеолара батсаап бөлөхтөрүн аайы тарҕанна.
Манна көстөрүнэн, сорох дьон полиция үлэһиттэрин өйдөтөр үлэлэрин ылынан, тиэтэйэ-саарайа хомунан дьиэлииллэр.
Хомойуох иһин, сөбүлэспэккэ, төттөрү аахсар дьон эмиэ баар. Баҕар, бүгүн этэҥҥэ күн ааспытын иһин, уонча хонугунан бу киһи доруобуйатын туруга хайдах буолуо биллибэт ээ. Оччотугар «таах сибиэ дьиэбэр сыппакка…» диэн кэмсинэрэ чахчы.
Итинник төттөрүлэһэр икки киһиэхэ өйдөтүү үлэтин ыыта сатаан баран, полиция үлэһиттэрэ боротокуол толорорго күһэлиннилэр. Онон маннык быһаарыылаах кэмҥэ ыстараап кытаанаҕын төлүүр туһунан дьаһал элбэҕин умнар сатаммат.
Ыам ыйын бырааһынньыктара чугаһаатылар. Сотору кэминэн тыаҕа тахсан күүлэйдии сылдьар дьон инстаграмы толороллоро чахчы. Ол эрээри, сыстыганнаах дьаҥ кэмигэр тыаҕа тахсыы бобуулааҕын умнумаҥ дуу. Коронавируһунан сутуллубут киһи ахсаана күн аайы элбии турара барыбытын дьиксиннэрэр эбээт!
Елена ПОТОЦКАЯ, «Саха сирэ» хаһыат, edersaas.ru
Хаартыска — видеоттан.