Бу дьыл алтынньы ыйыгар сымыйа 5 тыһыынча солкуобайынан төлөөһүн 20 чахчыта бэлиэтэммит. Бу дьону булууга полиция бүтүннүү туруммут.
Сэтинньи ыйга биир маҕаһыын атыылааччытыттан иһитиннэрии киирбит: биир киһи саарбах баҕайы көрүҥнээх 5 тыһыынчалаах купюранан төлөөбүтүн уонна ол киһини атыылааччы кэпсэппитэ буолан, тута сатыы турарын туһунан.
Уорбаланааччылар — дьахтардаах эр киһи — полицейскайдар кэлбиттэрин көрөн, массыыналарыгар олорон куотаары, кинилэр суолларын күөйэ турбут участковай боломуочунайы түҥнэри көтөн, утары суолга тахсан, хас да миэтэрэ соспуттар, куоппуттар.
Бу чахчынан силиэстийэ уорганнара РФ Холуобунай кодексатын 318-с ыст. 2-с чааһынан, ол эбэтэр, былаас бэрэстэбиитэлигэр күүһү туттуу бэлиэтэ баарынан, дьыала тэрийбиттэр.
Оттон уорбаланааччылары — 26 саастаах дьахтары уонна кини бииргэ олорор киһитин, урут сууттана сылдьыбыт 34 саастаах киһини — сотору кэминэн туппуттар. Иккиэннэрин силиэстийэлиир изоляторга хаайбыттар.
Барыллааһын силиэстийэ быһаарбытынан, бу киһи соҕуруу биир куораттан 5 тыһыынчалаах сымыйа харчылары ылбыт уонна Саха сиригэр сөмөлүөтүнэн буолбакка, сиринэн кэлэн, ол сымыйа купюраларынан төлүү сылдьыбыт.
Маныаха уорбаланымаары, сүрүннээн, куорат кытыытыгар турар, сымыйа харчыны билэр тэриллэрэ суох, дьоҕус маҕаһыыннарга атыылаһар эбит.
Аны туран, бу киһи олорор дьиэтин дьэҥдьийии түмүгэр, гашиштаах арыынан толоруллубут түөрт медицинскэй шприһи булбуттар. Бу чахчынан иккис холуобунай дьыала тэриллэн силиэстийэлэнэр.
Бу туһунан СӨ ИДьМ-тын пресс-сулууспата иһитиннэрдэ.
Биһиги корр., «Саха сирэ» хаһыат, edersaas.ru
Хаартыска: интэриниэттэн.