“Полиметалл” олохтоох каадырдары үлэҕэ ылыаҕа

Бөлөххө киир:

Москваҕа Уһук Илин эрэгийиэннэрин күннэрин чэрчитинэн, Ил Дархан Айсен Николаев уонна “Полиметалл” хампаанньа генеральнай дириэктэрэ Виталий Несис өрөспүүбүлүкэ социальнай-экэнэмиичэскэй сайдыытыгар сөбүлэһии түһэристилэр.

Көрсүһүүгэ каадыры бэлэмнээһин, тулалыыр эйгэни харыстааһын, хотугу аҕыйах ахсааннаах норуоттар төрүт үгэстэрин, култуураларын чөл хаалларыы туһунан кэпсэттилэр. Айсен Сергеевич Саха сиригэр, чуолаан тыа сиригэр, улуустарга, оройуоннарга, үлэ миэстэтин таһаарыы тыын суолталааҕын бэлиэтээн эттэ. Манна даҕатан эттэххэ, бу сөбүлэһии чэрчитинэн, 2000 үлэ миэстэтэ арыллыахтаах.
Билигин хампаанньа Хотугулуу-Илиҥҥи федеральнай университеты, Хаандыгатааҕы хайа-геологическай тиэхиньикуму кытта үлэлиир. Виталий Иванович бэлиэтииринэн, Саха сирэ хампаанньаҕа стратегическэй суолталаах эрэгийиэн. Даҕатан эттэххэ, хампаанньа Томпо оройуонугар кыһыл көмүһү уонна Дьааҥыга үрүҥ көмүһү хостуур.
“Полиметалл” эһиил кулун тутарга Саха сиригэр улахан фабрика тутар санаалаах. 2021-2022 сс. базатын толору кыахтарынан үлэлиэтиэхтээх. Оттон Дьааҥыга баар “Прогноз” үрүҥ көмүс баайдаах сирэ Арассыыйаҕа саамай улахан, аан дойдуга биир бастыҥ учаастак быһыытынан биллэр. Манна 2024 с. улахан фабриканы тутар былааннаах.
Хампаанньа бу икки үлэлиир улуустарын кытары сөбүлэһии түһэрсэн инфраструктураны оҥорууга, социальнай эйгэҕэ көмөлөһөр. Ол курдук, быйыл 15 мөлүйүөн солкуобайы инвестицияҕа куппут. Хампаанньа көмөтүнэн үөрэх эйгэтигэр алта эбийиэккэ өрөмүөн үлэтэ барбыт. Ону таһынан суол-иис оҥоруутугар, табаһыттарга көмөлөһөр эбит.

Аграфена КУЗЬМИНА, “Саха сирэ” хаһыат.

+1
0
+1
0
+1
0
+1
0
+1
0
+1
0
+1
0