Саха сиригэр поликлиникаларга уонна балыыһаларга иһитиннэрэр-коммуникационнай технологиялары туһаныы салҕанар. Олортон биирдэстэринэн регионнааҕы биир кэлим медицинскэй иһитиннэрэр систиэмэ буолар. Бу систиэмэ чэрчитинэн электроннай медицинскэй каарталар туһаныллаллар. Манна электроннай регистратура систиэмэтэ уонна «Ыарыһах тустаах кабинета» киирэр.
Надежда ЕГОРОВА, «Саха сирэ» хаһыат, edersaas.ru
Өрөспүүбүлүкэ олохтоохторо бырааска көрдөрүнэллэригэр дьиэлэриттэн тахсыбакка эрэ маннык көрүҥнэри туһанан суруйтарыахтарын сөп:
http://www.er14.ru/ сайтарыгар;
— «Электроннай регистратура» (android) босхо мобильнай сыһыарыы уонна «http://www.er14.ru/» (Ios) нөҥүө;
— gosuslugi.ru судаарыстыбаннай уонна муниципальнай өҥөлөр порталларыгар;
— e-yakutia.ru судаарыстыбаннай уонна муниципальнай өҥөлөр регионнааҕы порталларыгар;
— Дьокуускай к. call-киинин 8(4112)21-93-03 төлөпүөнүгэр;
— Регистратура төлөпүөннэригэр уонна медицинскэй тэрилтэлэр call-кииннэригэр эрийэн, инфоматтар нөҥүө;
Бэйэҕэр табыгастааҕын туһанан, бырааска суруйтарбыт киһи докумуоннарын илдьэ болдьохтоох кэмигэр поликлиникатыгар кэлэр.
«Ыарыһах тустаах кабинета»
Бу көрүҥ доруобуйа харыстабылын салаатыгар 2015 сылтан үлэлиир. «Тустаах кабинеттаах» киһи бырааска суруйтарарын сэргэ, урут хаһан суруйтарбытын, ханнык исписэлиискэ сылдьыбытын көрүөн, толуону бэчээттээн таһаарыан, бырааска барыы бириэмэтин уларытыан эбэтэр сотторуон сөп. Кылаабынайа, оҥоһуллубут медицинскэй өҥө туһунан иһитиннэриини билэр кыахтанар,
Дьокуускай к. уонна куорат таһынааҕы нэһилиэктэр олохтоохторо «Тустаах кабинеттанарга» логин уонна быстах пароль ылалларыгар ыарыһахтары өйүүр биир кэлим кииҥҥэ кэлиэхтэрин наада. Онтон нэһилиэнньэлээх пууннар олохтоохторо бэйэлэрин поликлиникаларын регистратуратыттан ыйыталаһаллар. Бу туһунан иһитиннэриини сиһилии «www.er14.ru» порталга ааҕыахха сөп.
СӨ Доруобуйа харыстабылын министиэристибэтэ олоххо киллэрэр технологиялара хас биирдии киһи балыыһаҕа, поликлиникаҕа сылдьара табыгастаах, элбэх бириэмэни ылбатын туһугар уонна өҥө хаачыстыбалаах буоларыгар көмөлөһөллөр.
Надежда ЕГОРОВА, «Саха сирэ» хаһыат, edersaas.ru