Подмосковье губернатора Андрей Воробьев ыам ыйын 22 күнүгэр мааскалаах сылдьыы эрэсиимин кытаатыннарарын туһунан иһитиннэрдэ. Билигин мааската суох уопсастыбаннай миэстэҕэ сылдьар дьону ыстарааптыыр буолуохтара.
edersaas.ru
Урут маасканы кэтии көннөрү сүбэ курдук эбит буоллаҕына, билигин көрдүлэр да, 4 тыһыынча солкуобайга ыстарааптаан иһиэхтэрэ. Ону тэҥэ, Москваҕа уонна аттынааҕы куораттарга бүгүҥҥүттэн төһө да “пропуск” эрэсиимин көтүрбүттэрин, дьиэттэн тахсыыны көҥүллээбиттэрин иһин, маассабай мустуу бобуллар. Оҕо былаһааккалара, пааркалар сабыылаахтар.
Москва уобалаһыгар Элбэх өҥөнү оҥорор кииннэр аһыллан эрэллэр. Ол да буоллар, атын харыстаныы миэрэлэрэ тутуһуллуохтаахтар.
Ыам ыйын 23 күнүгэр аҥаардас Москваҕа коронавируһунан 161 тыһыынча киһи ыарыйда, 1924 киһи суорума суолланна. Москва уобалаһыгар барыта 32 650 киһи, суукка иһигэр 846 киһи ыарыйда. Оттон Арассыыйа үрдүнэн суукка иһигэр 9434 киһи ыарыйда.
Онон сайын кэлбиччэ, дьиэттэн тахсан көҥүл күүлэйдээн, мааската, бэрчээккитэ суох сылдьан, атын дьоннуун алтыһан, ыарыыны хабан ылыахха, чугас дьоҥҥун сыһыарыахха сөп. Дьокуускайга да эрэсиими кытаатыннарар кэриҥнээхтэр. Өрөспүүбүлүкэҕэ уодаһыннаах ыарыы элбээн иһэрэ, сууккаҕа 100 киһи ыалдьыбыта да ону туоһулуур.
Ангелина Васильева, “Саха сирэ” хаһыат, edersaas.ru
Хаартыска: m24.ru