Бу күннэргэ Благовещенскай куоракка Уһук Илиҥҥи уокурукка почта опрератордарын куонкуруһа ыытыллыахтаах. Киин куоракка суолталаах тэрээһиҥҥэ Саха сириттэн кыттыахтаах почта сибээһин бастыҥ операторын сүүмэрдиир күөн-күрэс буолла.
Елена ПОТОЦКАЯ, «Саха сирэ» хаһыат, edersaas.ru
Арассыыйа почтатын Саха сиринээҕи филиалыгар 428 сибээс отделениетыгар 2500 киһи үлэлиир. Бу дьон үлэлэрин көҕүлүүр сыалтан сыл аайы салалта почта үлэһиттэригэр араас таһымнаах күөн-күрэстэри тэрийэн ыытар. Ол курдук, былырыын почта сибээһин салайааччылара уонна почтальоннар бастыҥ ааты ылар иһин күрэстэспиттэрэ. Быйыл почта оператордара уонна суоппардар икки ардыларыгар күөн-күрэс буолуохтаах. Оператордар муус устар 25 күнүгэр күрэхтэстилэр, оттон суоппардар күһүн күөн көрсүөхтэрэ. Почта оператордарын куоталаһыыларыгар Нерюнгриттан, Удачнайтан, Ньурбаттан, Дьокуускайтан, Аллараа Бэстээхтэн, Чурапчыттан, Өлөөнтөн уонна Тулагыттан кэлэн кытыннылар.
Үс этаптаах куонкуруһу ситиһиилээхтик ааһан, “2017 сылга сибээс бастыҥ оператора” диэн Бүтүн Сойуустааҕы куонкурус регионнааҕы күөн-күрэһин кыайыылааҕынан Нерюнгри куораттан Валентина Соколова буолла.
— Почта оператордарын куонкуруһа Арассыыйа бары регионнарыгар ыытылла турар. Манна буолбут күрэскэ куонкурустаһааччылар анал бырайыак оҥорон аҕалан көмүскээтилэр. Ону сэргэ, араас уустук ыйытыыларга хоруйдаан, баһылаабыт идэлэрин таһымын көрдөрдүлэр. Саха сириттэн кыайыылаах Благовещенскайга өрөспүүбүлүкэ чиэһин көмүскүү барар, — диэн санаатын үллэһиннэ Среднеленскэйдээҕи почтамт салайааччыта Светлана Леонтьева.
Онон сотору Нерюнгри почтатын оператора Светлана Соколова Благовещенскайга тиийэн, Уһук Илин уокуругун бастыҥнарын кытта күөн көрсүөҕэ.
Елена ПОТОЦКАЯ, «Саха сирэ» хаһыат, edersaas.ru
Ааптар хаартыскаҕа түһэриитэ