Арассыыйаҕа — Балет сыла. Итиннэ сөп түбэһиннэрэн, Арассыыйа балетын сайдыытыгар сүҥкэннээхэй кылаатын киллэрбит хореограф Мариус Петипа төрөөбүтэ 200 сыла дуорааннаахтык бэлиэтэнэр.
Бүтүн Арассыыйатааҕы тэрээһин чэрчитинэн, Дьокуускайга бу күннэргэ “Наследие Мариуса Петипа – основа системы классического танца” өрөспүүбүлүкэтээҕи научнай-творческай кэмпириэнсийэ буола турар.
Онон үҥкүү эйгэтин сэҥээрээччилэр Аксения уонна Наталья Посельскаялар ааттарынан Дьоксуукайдааҕы балет оскуолатыгар (кэллиэскэ) муһуннулар. СӨ үтүөлээх артыыската, балет оскуолатын дириэктэрэ Дария Дмитриева, СӨ култуура уонна духуобунай сайдыы миниистирэ Владимир Тихонов, уо.д.а. истиҥник эҕэрдэлээтилэр. Салгыы эбии үөрэхтээһин тэрилтэлэрин салайааччылара, исписэлиистэрэ, наука үлэһиттэрэ, ускуустуба уонна култуура үөрэҕин преподавателлэрэ, устудьуоннар, иитиллээччилэр улуу балетмейстер үлэтин-хамнаһын, олоҕун-дьаһаҕын туһунан иһиттилэр. Петипа балета аан дойдуну тилийэ көтүүтүн, Арассыыйаҕа уонна Саха сиригэр үҥкүүнү үөрэтэр кыһаларга, аныгы балеттарга ытык киһи үлэтин суолтатын туһунан о.д.а. кэпсэттилэр.
Тэрээһин түһүлгэтигэр Абыйтан, Амматтан, Дьааҥыттан, Горнайтан, Сунтаартан, Тааттаттан, Чурапчыттан, уопсайа 15 улуустан, Дьокуускай куораттан, үөрэх тэрилтэлэриттэн барыта 180 устудьуон, преподавателлэр кытыннылар.
Салгыы “Дивертисмент” өрөспүүбүлүкэтээҕи классическай үҥкүү куонкуруһа ыытылынна. Бастакытын ыытыллар күөн күрэскэ искусство, муусука оскуолаларын үөрэнээччилэрэ, оҕо балетнай устуудьуйатыгар дьарыктанааччылар, устудьуоннар кытыннылар. Кинилэргэ анаан бэртээхэй маастар-кылаастар ыытылыннылар. Куонкуруһу дьүүллүүр сүбэ сыаналаата.
Тэрээһин Опера уонна балет судаарыстыбаннай тыйаатырыгар улахан кэнсиэринэн түмүктэннэ. Дууһаны сылаанньытар, хараҕы сымнатар кэнсиэргэ Дьоксуукайдааҕы балет оскуолатын (кэллиэс) үөрэнээччилэрэ, устудьуоннара, Галина Уланова Пуондатын стипендиаттара, Бүтүн Арассыыйатааҕы уонна аан дойдутааҕы куонкурустар лауреаттара, дипломаннара, уо.д.а. кытыннылар.
Манна даҕатан эттэххэ, РФ Бырабыыталыстыбатын бэрэссэдээтэлин солбуйааччы Ольга Голодец өссө 2016 с. Санкт-Петербурга норуоттар икки ардыларынааҕы Култуура IV-с Пуорумугар Арассыыйаҕа Балет сылын биллэрэр туһунан этии киллэрбитэ.
Биһиги корр., “Саха сирэ” хаһыат, edersaas.ru