Уус Алдантан төрүттээх эдэр фотограф дойду таһымнаах истипиэндьийэ ылла
Саха сириттэн сылдьар эдэр фотограф Алексей Павлов РФ Бэрэсидьиэнин Ыйааҕынан бэриллэр култуура уонна искусство диэйэтэллэригэр анаммыт истипиэндьийэни ылла.
Алексей Павлов Уус Алдан улууһун Бороҕонуттан төрүттээх. Кини Ураллааҕы судаарыстыбаннай юридическай университеты, «Докдокдок» диэн хаартыска оскуолатын бүтэрбитэ. Билигин Санкт-Петербурга олорор, үлэлиир.
Алексей бэйэтэ хас даҕаны бырайыактаах. Кини үлэлэрэ The Calvert Journal, Zapovednik, Lenta.ru, Bird in Flight диэн таһаарыыларга, «Огонек» сурунаалга тахсыбыттара. Маны таһынан, биир дойдулаахпыт World Biennial of Student Photography, Bar Tur Photo Award диэн хаартысканан үлүһүйээччилэр куонкурустарын кыайыылааҕа, «Выкса арт-резиденция кыттыылааҕа буолар.
Эдэр киһи ситиһиитин туһунан маннык кэпсиир:
— Былырыын Арассыыйа фото-худуоһунньуктарын сойууһугар киирбитим. Сойуустарга анаан РФ Култууратын министиэристибэтэ араас хабааннаах истипиэндьийэлэри аныыр. Маныаха мин быйыл тугунан дьарыктаныахпын, туох саҥаны олоххо киллэриэхпин баҕарарбын сиһилии быһааран, бырайыак суруйан ыыппытым. Ону кытта былырыын Арассыыйаҕа баар нанай омуктары хаартыскаҕа түһэрбит үлэбин сыһыарбытым уонна дойдубутугар олорор аҕыйах ахсааннаах төрүт норуоттары хаартысканан үйэтитэр сыаллаахпын эппитим.
Коронавирус пандемията туран былааннарым ыһылыннылар. Муус устарга Дагестаҥҥа эспэдииссийэҕэ айанныахтаах, аны Францияҕа бэстибээлгэ кытта барыахтаах этим. Сайын Ростовка уонна Карелияҕа барыахпын баҕарбытым, эмиэ билиҥҥитэ туох даҕаны биллибэт.
Алексей үлэлэрин кини тус саайтыгар — https://leshapavlov.com уонна «Инстаграмҥа» — instagram.com/lesha_pavlov/ страницаҕа көрүөххүтүн сөп.
Айтана Аммосова, edersaas.ru
Хаартыскалар — Алексей архыыбыттан.