Саҥа Дьыл үһүс күнүгэр Саха цииркэтигэр 80-с сылларга аатырбыт Франция «Оttawan» эстраднай бөлөҕө кэнсиэрдээтэ.
edersaas.ru
Биллэн турар, «Ottawan» бөлөҕү «D.I.S.C.O.» уонна «Hands Up (Give Me Your Heart)» аатырбыт ырыаларынан 80-с сыллар саҥаларын саҕанааҕы оскуола оҕолоро уонна ол кэмҥэ устудьуоннаабыт ыччаттар умнуллубаттык дууһаларыгар күн бүгүҥҥэ диэри илдьэ сылдьаллар. Ол да иһин буолуо, «оттаваннары» көрөөрү цииркэҕэ үгүс киһи мустубут.
Кинилэр «бэйэлэрин» киһилэрин, «Ottawan» бөлөх солиһын Жан-Батиста Патригы оҕо уонна эдэр саастарын кумирдарын бэрт ыраахтан сахалыы-нууччалыы: «Патрик, кэл-кэл! Иди сюда-а!», — диэн ыҥыран, хаартыскаҕа түстүлэр. Киһилэрэ да улгума сүрдээх — сүүрэн кэлэн түсүһэн иһэр.
Жан-Батиста Патрик 1954 с. күн сирин көрбүт. Оҕо эрдэҕиттэн ыллыан олус баҕарар эбит. Үөрэҕин бүтэрээт, Парижка тиийэн баарга ырыаһытынан үлэлээбит. Ол ыллыы сырыттаҕына, кинини оччолорго Далиданы кытта үлэлии сылдьыбыт аатырбыт муусука продюсера Даниэль Вангар бэлиэтии көрөн, эстрада анал бөлөҕөр ыллыырга ыҥырбыт. Дьэ, онтон ыла саҕаланар Жан-Батиста Патрик аан дойдуга аатырыыта. Ити 1979 сыл күһүнэ этэ.
«Ottawan» диэн бөлөх ааты ылыныы эмиэ туспа устуоруйалаах. Ол курдук, продюсер саҥа ааты толкуйдууругар аан дойду каартатын ылан баран, түбэһиэх куоракка сөмүйэтин уурбута — Канада Оттава куората түбэһэ биэрбит. Онно биир «н» буукубаны эбэн биэрэн, «Ottawan» оҥорбуттар.
«Ottawan» диско-бөлөх 1980 с. «T’es OK» ырыатын киэҥ араҥаҕа таһаараатын кытта, эмискэ аатыра түспүтэ. Бу ырыа Францияҕа 1 №-дээх ырыанан буолбута. Оннооҕор оччолорго уостан түспэт диско хоруоллара Boney M бөлөх умнулла быһыытыйбыта. Бу ырыаны «оттаваннар» ыллааттарын кытта, Саха цииркэтигэр дьон олорор сирдэриттэн ойон тураат, тэҥҥэ үҥкүүлэспитинэн бардылар. Ыллаан бүтээттэрин кытта, ырыаһыттары эмиэ олох чугас доҕотторун ыҥырардыы:»Патрик», «Изабель» — бөҕө буоллулар. Эчи, ааттарын ааҕа билэллэрэ да бэрт эбит. Ол аайы дьоммут барыларын кытта дорооболоһоору, цииркэни тула сүүрэллэр.
Ол кэннэ солистка Япи Изабелль дьон ортотугар Патригар бэрт истиҥник махтанна. Онуоха ытыс тыаһа хабылла түстэ.
«Ottawan» диско-бөлөх солисткалара уларыйа тураллар эбит. Патриктыын бастаан саҕалаабыт Аннетт Эльтис икки эрэ сыл ыллаабыт. «Майгыта мөлтөх»- диэн тута быраһаайдаспыттар. Онтон Тамара аҕыс сыл ыллаабыт. Кинини тоҕус сыл устата Кристина солбуйбут. Ол кэнниттэн алта сыл Патрик балта Каролина ылласпыт. Билигин Япи Изабелль ыллаһа сылдьар. Интернет чахчытынан билиһиннэрдэххэ итинник. Кинини аатырбыт ырыаһыт: «Кыыһым», — диэн билиһиннэрдэ.
Дьэ, ити курдук, «Ottawan» диско-бөлөх саха дьонугар эдэр саастарын, устудьуоннаабыт күннэрин санатан, дууһаларыгар уһугуннаран, Саҥа дьыллааҕы дьиктилээх кэмнэрин төнүннэрдилэр.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа ааптар түһэриитэ