От ыйын ортото тымныы полюһугар — Өймөкөөҥҥө хаар түстэ!

Ааптар: 
Бөлөххө киир:

Бу сарсыарда социальнай ситимнэри тымныы полюһугар — Өймөкөөҥҥө халыҥ хаар түспүт хаартыскалара толордулар.

edersaas.ru


Хаһан да буоларын курдук, хаар бастаан улуус биир киэн туттар сиригэр — Уолчаан сиһигэр (Ольчанский перевал) түспүтэ.

Онтон Уус-Ньара хайаларыгар хаардаабыта.

Онтон бу сарсыарда Үчүгэй нэһилиэгэр хаар түспүт туоһута — араас ис хоһоонноох хаартыска батсаабы толордо.

Үчүгэй оҕоруотчуттара теплицаларын түүнү быһа оттубуттар. Таһырдьааҥҥы оҕуруот аһын уга барыта үлүйбүт.

Оттон сүөһүлэр мэччийэ барбакка, дьиэ таһын буллулар.

Бу маннык тыйыс усулуобуйаҕа олорорго үөрэхтээх дьоммут. Хаар бэс ыйыгар  түһээччи. Ол эрээри от ыйын ортото маннык халыҥнык хаардыы илигэ. Бу ыйга уһун ардах түһэн, алдьатыылаах халаан буолар кэмэ. Онон эвакуациялыыр кииннэри эрдэттэн бэлэмнээн, аһы-үөлү, эми-тому чугаһатан олоробут. Олохтоохтор да халаан тахсар түбэлтэтигэр бэлэм олороллор, — диэн Томтор нэһилиэгин баһылыгын солбуйааччы Екатерина Винокурова иһитиннэрдэ.

Былырыын атырдьах ыйын саҥатыгар Өймөкөөн улууһугар  буолбут алдьатыылаах халаан кэмигэр Ил Дархан Айсен Николаев бэйэтинэн тиийэн олохтоохтору кытта көрсүбүтэ, санааларын истибитэ. Ол кэнниттэн улууска, нэһилиэктэргэ тустаах өйөбүл, көмө көрүллүбүтэ. Уопсайынан, кэлиҥҥи биэс-алта сылы субуруччу Өймөкөөн улууһугар уһун ардахтан халааннаан суолу, муостаны алдьатан эрэйдиир.

Бу сыллар тухары бырабыыталыстыба, кэккэ министиэристибэлэр уонна биэдэмистибэлэр улуус салалтатыттан киирбит туһааннаах докумуоннары үөрэтиигэ хамыыһыйа ыыта охсон, үөрэтэн, араас алдьатыылары кэмигэр туоратан, өрөмүөннээн иһэллэр.

Онон олохтоохтор кыстыкка этэҥҥэ киирэн, кыһын суолга-иискэ эрэйи өрбөттөр. Ол эрээри сыл аайы улахан халаан алдьатыыта хатылана турар…

Өймөкөөн улууһугар бу кэмҥэ уһун ардахтарга хайа хаардара ууллан, үрүйэлии устан суолу алдьатар, улахан халааны таһаарар кэмнэрэ үүннэ.

Cыл аайы баччаларга олохтоохтор бу курдук айанныырга күһэллэллэр.

 Бу күннэргэ: «Кыһыннары 60 кыраадыс тымныылаах, сайын от ыйын ортото эмискэ тымныйар, хаар түһэн оҕуруоппут  аһын сыыһыттан матарар, аан дойдуга тымныы полюһунан биллэр тыйыс усулуобуйаҕа олорор улууспут Арктика зонатыгар киирэрэ тоҕо бобуулааҕый?! » — диэн Өймөкөөн улууһун олохтоохторун сиэрдээх ыйытыылара батсаабы толордо.

Онон Ил Түмэн Арктика боппуруостарыгар сис кэмитиэтэ уонна өрөспүүбүлүкэҕэ бэйэтин үлэтин ситиһиилээхтик саҕалаабыт Арктика министиэристибэтэ, Өймөкөөн улууһун олохтоохторо тыйыс усулуобуйаҕа олороллорун учуоттуулларыгар, бу от ыйын ортотугар түспүт хаар туоһу буолла. Өймөкөөн улууһа Арктика зонатыгар киирэрэ уолдьаста.

Елена ПОТОЦКАЯ, «Саха сирэ» хаһыат, edersaas.ru

Хаартыска: интернеттэн, социальнай ситимнэртэн.

+1
0
+1
0
+1
0
+1
0
+1
0
+1
0
+1
0