РФ Үөрэҕириигэ министиэристибэтэ оскуоланы бүтэрэр тэрээһиннэри бэс ыйын 27 күнүгэр онлайнынан ыытыҥ диэн эрэгийиэннэргэ сүбэ суруктары ыыталаабыта.
Быйыл дойду үрдүнэн 692 тыһыынча, Саха сиригэр 7948 оҕо оскуоланы бүтэрэр. Коронавирус үөрэх салаатыгар улахан уларытыыны таһаарда. Туох барыта ыраахтан, дьиэҕэ олорон ыытыллар. Ол иһигэр оскуоланы бүтэрэр банкет эмиэ.
Бүтүн Арассыыйатааҕы түмүктүүр тэрээһини бэс ыйын 27 күнүгэр былаанныыллар. Киэҥ бырагыраамалаах буолуо диэн мэктиэлииллэр. Ол курдук, кэнсиэрдээх, сүүйүүлээх бириистээх, видео сибээһинэн биллэр-көстөр актердары, мусукааннары кытта сэһэргэһиилээх барыаҕа дииллэр. Биллэн турар, итини таһынан, хас биирдии оскуола хайдах, тугу толкуйдуурунан, фантазията төһө тиийэринэн бэлиэ тэрээһини киэргэтэн биэриэн сөп.
РФ Үөрэҕириигэ миниистирэ Сергей Кравцов: “Баар балаһыанньаны учуоттаан туран, оскуоланы бүтэрэр тэрээһини онлайнынан ыытарга сүбэлиибит. Онтон биир кэлим эксээмэн (ЕГЭ) бүппүтүн кэннэ эбэтэр арыый хойутуу олоҕурбут ньыманан бырааһынньыктыахха сөп”, — диэн эттэ.
Банкет урукку халыыбынан коронавируһунан сибээстээн, хааччахтааһыны устуу үһүс түһүмэҕэр тахсыбыт эрэгийиэннэргэ эрэ, ону даҕаны туох баар санитарнай-эпидемиологическай ирдэбили барытын тутуһан ыытыллыан сөп диэн иһитиннэрэллэр.
“Саха сирэ” хаһыат, edersaas.ru