Оскуола оҕото хас кыраадыска үөрэммэтий? Төрөппүт туох эбээһинэстээҕий?

Ааптар: 
Бөлөххө киир:

Бытарҕан тымныылар түһэн, сорох улуустарга бу нэдиэлэҕэ оҕолор үөрэммэтилэр. Мантан инньэ өссө тымныйыа турдаҕа. Онон оҕолор хас кыраадыска үөрэммэттэрин уонна туох эбээһинэстэр баалларын санатар тоҕоостоох.


Дьокуускай куораттааҕы үөрэх управлениетын 2017 сыл тохсунньу 19 күнүнээҕи «Күн-дьыл, санитарнай-эпидемиологическай усулуобуйа, о.д.а. балаһыанньа үөскээтэҕинэ, Дьокуускай куоракка үөрэҕи тохтотор туһунан» бирикээһигэр олоҕуран, Дьокуускайга муниципальнай үөрэх тэрилтэлэригэр -45 кыраадыска 1-5 кылаастарга, -48 кыраадыска 1-8 кылаастарга, -50 кыраадыс тымныы буоллаҕына 1-11 (12) кылаастарга үөрэх тохтотуллар.

Оҕо билбэккэ оскуолаҕа тиийэн хаалар түгэнигэр, учуутал төрөппүттэри сэрэтиэхтээх, хаска барбытын иһитиннэриэхтээх.

Оттон төрөппүттэр (сокуоннай бэрэстэбиитэллэр) туох бырааптаахтарый, эбээһинэстээхтэрий? Бастатан туран, тымныынан сибээстээн, бэйэлэрин көрүүлэринэн, оҕолорун үөрэтэ ыытымыахтарын сөп. Ол эрээри, ити туһунан кылаас салайааччытын хайаан даҕаны сэрэтиэхтээх. Иккиһинэн, оҕо дьиэтээҕи үлэтин толорорун хонтуруоллуохтаахтар, ол иһигэр дистанционнай технологияны туһанан. Тымныынан, санитарнай-эпидемиологическай услуобуйанан үөрэх тохтообут кэмигэр, оҕо эрэсиими тутуһарын төрөппүт ирдиэхтээх.

Хас биирдии улууска үөрэх управлениета хас кыраадыс тымныыга оҕолор үөрэммэттэрин эрдэттэн иһитиннэрэр. Саха сирэ тайаан сытар иэнэ киэҥ, онон кыра уратылаах. Сиһилии кылаас салайааччытыттан, үөрэх управлениетын саайтыттан билсиэххитин сөп.

Людмила ПОПОВА, “Саха сирэ” хаһыат, edersaas.ru

Хаартыска: СИА

+1
0
+1
0
+1
0
+1
0
+1
0
+1
0
+1
0