Бэҕэһээ СӨ Үөрэҕин уонна наукатын министиэристибэтин бирикээһэ таҕыста. Туһааннаах бирикээскэ олоҕуран, үөрэх дьыла эрдэ түмүктэммэт, ыам ыйыгар эмиэ салҕанар.
edersaas.ru
Санатан эттэххэ, РФ Үөрэҕириигэ министиэристибэтэ эрэгийиэннэр министиэристибэлэригэр коронавируһунан сибээстээн, эрэгийиэннэр үөрэҕи хайдах ыытыахтарын сөбүн туһунан сүбэ суругу (рекомендация) ыыппыта. Онно олоҕуран, бэҕэһээ СӨ Үөрэҕин уонна наукатын министиэристибэтэ бирикээс таһаарда. Бирикээс туох ис хоһооннооҕуй?
Бастакытынан, 1-4, 5-8 уонна 10-с кылаас үөрэнээччилэрэ бу сыл муус устар-ыам ыйдарыгар дистанционнай ньыманан үөрэнэллэр диэн ыйыллар. Ыйыллыбыт кылаастар онлайн эрэсииминэн үөрэнэллэрин аҕыйатарга диэбиттэр.
Иккиһинэн, үрдүкү кылаас оҕолоругар үөрэх бырагырааматын толору ыытарга, ол иһигэр, дистанционнай ньыманы уонна өрөспүүбүлүкэтээҕи, федеральнай тэлэбиидэнньэнэн биирдиилээн биридимиэттэргэ ыытыллар биэриилэри туһанан үөрэтиҥ диэн ыйыллыбыт. Эксээмэҥҥэ киирбэтэх эбэтэр оҕо талбатах биридимиэттэригэр, ааһан эрэр үөрэх кэмин (четвертый/триместр) түмүгүнэн аттестациялааҥ диэбиттэр.
Үсүһүнэн, үөрэҕи ханнык ньыманан ыытарга быһаарыммыккытын СӨ Үөрэҕин уонна наукатын министиэристибэтин кытта сөбүлэһиннэриҥ дэммит.
Людмила ПОПОВА, «Саха сирэ» хаһыат, edersaas.ru
Хаартыска: iStock