Майатааҕы В.П.Ларионов аатынан оскуола биисинэс-инкубатора бэйэтин бородууксуйатын – барыанньа араас көрүҥүн батарарга хантараак түһэристэ. Билигин Саха сирин үөрэнээччилэрин минньигэс бородууксуйаларын “Сахаагропродукт” атыылыыр миэстэлэриттэн ылыахха сөп. Инньэ гынан, оскуола биисинэс-инкубаторын үлэтин өйүүргэ маҥнайгы хардыы оҥоһулунна.
edersaas.ru
“Сахаагропродукт” атыыга батарыыга салаатын начаалынньыга Татьяна Кириллина бэлиэтииринэн, агрооскуола бородууксуйата эспэртиисэни ситиһиилээхтик ааспыт итиэннэ “СӨ бородууксуйа уонна өҥө хаачыстыбатын бигэргэтэр киин” тэрилтэ көмөтүнэн сөп түбэһэрин туһунан декларацияны ылбыт.
Маҥнай Дьокуускай куоракка 11 атыы туочукатыгар 250 кыраамнаах 80 солкуобайдаах отон барыанньатын боруобалыыр баартыйаны атыыга таһаарбыттар. Бастакы баартыйа көрүөх бэтэрээ өттүгэр бүппүт. Бу күннэргэ олохтоох биэ эмиийэ, дьэдьэн, долохоно, күлүүкүбэ, дөлүһүөн, хаптаҕас, моонньоҕон, мүөт эбиликтээх өссө 100 бааҥка отон барыанньаны атыыга таһаарыахтара.
Биисинэс-бырайыагынан дьарыктанар өйүк (идея) соторутааҕыта эрэ киирбит. “Оскуолабытыгар 860 оҕо үөрэнэр. Сыллата балаҕан ыйын маҥнайгы өрөбүлүгэр “Отон” диэн тэрээһини ыытабыт. Хомуллубут отон сорҕотун оскуола остолобуойугар оҕолор сииллэригэр хаалларабыт, атынын барыанньа оҥорон атыылыырга быһаарынныбыт”, — диэн агроблок салайааччыта, производственнай үлэ маастара Розалия Васильева кэпсиир.
Майатааҕы В.П.Ларионов аатынан оскуола биисинэс-инкубаторын эдэр урбаанньыттарын бородууксуйаларын көрүҥүн сотору элбэтиэхтэрэ.
СӨ Ил Дарханын уонна Бырабыыталыстыбатын пресс-сулууспата.