Оскуолаҕа оҕону киллэрэргэ электроннай уочаракка сурут

Ааптар: 
Бөлөххө киир:

Бары өйдүүр инигит, былырыыҥҥа диэри Дьокуускай куорат сорох биллэр-көстөр оскуолаларыгар оҕолорун үөрэттэрэ биэриэн баҕалаах төрөппүттэр WhatsApp-испииһэк оҥорбуттарын. Ону ааһан сайабылыанньа ылыы саҕаланыан хас да хонук иннинэ, халлаан тымныытын да аахсыбакка кэлэн, оскуола иннигэр уочарат олохтуулларын. Ити барыта – маҥнайгы кылааска киирэр оҕо ханна регистрациялааҕынан үөрэниэхтээх диэн бирикээс тахсыаҕыттан саҕаламмыта. Аны билигин итинник уочараттааһын, хата, суох. Төрөппүттэр дьиэлэригэр олорон көмпүүтэрдэриттэн, төлөпүөннэриттэн интэриниэккэ киирэн, аҕыйах хонуопканы эрэ баттыахтарын наада.

Историяҕа” киирбит уочарат

Саамай улахан айдааннаах уочарат былырыын буолбута. Ол курдук, Дьокуускай куорат классическай гимназиятыгар оҕолорун маҥнайгы кылааска үөрэттэрэ киллэриэн баҕалаах төрөппүттэр, күһүн эрдэттэн WhatsApp-испииһэк оҥорбуттарын, онно номнуо 200-чэкэ киһи суруйтарбытын туһунан сурах иһиллибитэ. Аны сайабылыанньаны ылар күннэрин быдан хас да хонук иннинэ гимназия таһыгар дьон уочарат олохтообуттара. Итинтэн ыксаабыт төрөппүт оҕом баҕалаах гимназиятыттан матар кутталланна диэтэҕэ буолуо, биир үтүө сарсыарда 5 чааска кэлэн, мин бастакыбын, миэстэбиттэн харыс да халбарыйбыппын диэбит сурахтааҕа. 

Ити иннинэ, Дьокуускай куорат эмиэ биир тарбахха баттанар 17-с -дээх оскуолатын иннигэр төрөппүттэр уһун-киэҥ уочаракка туралларын көрдөрөр хаартыскалар интэриниэт ситимигэр тилийэ көппүттэрэ. Маннык буоллаҕына хайдах да табыллыбатын өйдөөн, сайабылыанньаны ылыы атын суолун тобулбуттара.

Аны хонуопканы эрэ баттыыбыт

Биллэн турар, маҥнайгы кылааска киирэр оҕолору оскуолаҕа ылыы электроннай уочаракка көһүөн иннинэ, Дьокуускай куорат Үөрэххэ управлениета үгүс үлэни ыыппыта. Ол курдук, Россия атын регионнарыгар бу хайдах быһыылаахтык үлэлии турарын үөрэтэн көрбүтэ. Итиэннэ Москва, Санкт-Петербург курдук улахан куораттарга элбэх киһи сайабылыанньатын тэҥинэн биэрэрин уйбакка, сайт «ыйанан» хаалар түгэннэрэ тахсыталыырын бэлиэтээбиттэрэ. Билигин дьон туох баар сайабылыанньаны бука барытын кэриэтэ интэриниэт нөҥүө биэрэр. Тиэхиньикэ аата тиэхиньикэ, “хардаҕына” да ыраахтан аҕалбат. Оннук түгэн тахсыбатын туһугар, сайабылыанньаны биэриини икки түһүмэхтээн ыытарга быһаарыммыттара.

Электроннай уочаратынан суруйтарыыга туох баар иһитиннэрии барыта балаҕан ыйын 29 күнүттэн Дьокуускай куорат Үөрэххэ управлениетын сайтыгар баар. Төрөппүттэр хайдах быһыылаахтык киирэн регистрацияланалларыттан саҕалаан, тустаах дьиэ ханнык оскуолаҕа сыһыарыллыбытыгар тиийэ барыта ыйылла сылдьар.

Бастакы түһүмэҕи кэтээн көрдөххө, улахан кыһалҕалаах боппуруостар суохтар. Дьокуускай куорат салайааччыта Айсен Николаев пресс-конференцияҕа ити туһунан аҕыйах тылы этэ аһарда. Кини этэринэн, чаас аҥара иһигэр кылаастар бары туолбуттар. Элбэх киһи электроннай уочаракка суруттарарыгар сөптөөх прописката суох эбит. Дьиҥэр оскуола чугаһыгар бигэргэммит оройуоҥҥа прописка ирдэнэр.

Наталья Степанова, Дьокуускай куорат Үөрэххэ управлениетын мониториҥҥа уонна хаачыстыбаҕа отделын начальнига:

Дьокуускай куоракка уопсайа 50 оскуола баар. Бу оскуолалартан электроннай уочаратынан сайабылыанньаны 42 оскуола ылар. Статистика кэрэһилиирэнэн уонна уһуйааннарга бэлэмнэнии бөлөххө сылдьар оҕолору учуоттаан тураммыт, быйылгы 2016-2017 үөрэх дьылыгар 4700 кэриҥэ оҕо оскуолаҕа киириэ диэн былааннаабыппыт. Ол эрээри, куоракка көһөн кэлии сыллата эбиллэ турарынан сибээстээн, 4933 оҕо маҥнайгы кылааска киирэн үөрэнэ сылдьар. Онтон эһиил, 2017-2018 үөрэх дьылыгар 5500 оҕо бастакы кылааска киириэ диэн сабаҕалыыбыт. Эһиилги үөрэх дьылыгар оҕону ылыы икки түһүмэҕинэн барар. Бастакы түһүмэх алтынньы 15 күнүттэн саҕаламмыта. Онно уопсайа 11 оскуола хабыллыбыта. Иккис түһүмэх сэтинньи 15 күнүттэн саҕаланна.

Сэтинньи 15 күнүттэн – II түһүмэх

Сайабылыанньаны ылыыга иккис түһүмэх саҥа саҕаланна. Сэтинньи саҥатынааҕы чахчынан, 1401 сайабылыанньа киирэн турар. Омос көрдөххө, сыыппара кыра курдук көстөр. Тоҕо диэтэххэ, РФ Үөрэххэ уонна наукаҕа министиэристибэтинэн бигэргэтиллибит бирикээскэ олоҕуран, от ыйын 1 күнүгэр диэри куоракка регистарациялаах эрэ төрөппүттэр оҕолорун оскуолаҕа суруйтарар бырааптаахтар. Кистэл буолбатах, күн бүгүн куорат олохтоохторун 30-ча бырыһыана улууска пропискалаахтар.

Төрөппүт, болҕой!

Төрөппүттэр Элбэх функциялаах киин (МФЦ – многофункциональный центр) эрэ нөҥүө буолбакка, бэйэлэрэ дьиэлэриттэн олорон сайабылыанньа биэриэхтэрин эмиэ сөп. Билигин хас төрөппүт барыта төлөпүөннээх, элбэх ыал дьиэтигэр интэриниэттээх. Ол эрээри, https://esia.gosuslugi.ru/registration диэн аадырыска киирэн бэйэ кабинетын арыммыт эрэ киһи оҕотун электроннай уочаратынан суруйтарар кыахтаах. Бэйэ кабинетын арыныы хаһан даҕаны хаалбат. Билигин туох баар тэрилтэлэр бары сайабылыанньаны интэриниэт нөҥүө ылаллар. Бэйэ кабинетын арыныы олохпут ирдэбилэ буолар. Оччоҕо сайабылыанньаны ылыы саҕаланна даҕаны, edu.e-yakutia.ru өрөспүүбүлүкэ үөрэххэ өҥөтүн порталыгар киирэн, бүтэһик дааннайдарын эрэ толорон биэрэллэр.

Наталья Романовна Степанова сайабылыанньаны толорорго болҕомтолоох буолуохха наадатын тоһоҕолоон бэлиэтиир. Холобура, сорох төрөппүттэр пааспардарын сиэрийэтин, сорохтор оҕолорун миитэрэкэтин нүөмэрин, сиэрийэтин суруйбакка хаалаллар эбит. Итиэннэ оҕо аҕата, ийэтэ диэн тус-туспа строкалар толоруллаллар. Онно ийэ аатын суруйуллуохтаах строкаҕа аҕа аатын суруйан кэбиспит буолаллар эбит. Итинник түгэҥҥэ портал сайабылыанньаны ылбат. Өскөтүн интэриниэт ситимин https://esia.gosuslugi.ru/registration/ диэн аадырыһыгар бэйэлэрэ кыайан регистрацияламматах эбэтэр http://edu.e-yakutia.ru/ өрөспүүбүлүкэ үөрэххэ порталыгар сайабылыанньа биэрэр кыаллыбат буоллаҕына, инфоромационнай хааччыйыы салаатыгар эбэтэр Элбэх функциялаах киин (МФЦ – многофункциональный центр) офистарыгар тиийэн сүбэ ылыахтарын сөп.

Людмила ПОПОВА.

+1
0
+1
0
+1
0
+1
0
+1
0
+1
0
+1
0