Көмүс күһүммүт тиийэн кэлэн, саҥа үөрэх дьыла саҕаланан, Дьокуускай куорат устудьуонунан туолла. Уопсайга олоруу устудьуоҥҥа эдэр саас умнуллубат кэрэ кэмэ буолар. Орто анал үөрэхтэр устудьуоннара уопсайдарга олохсуйдулар, үлэлэрэ, олохторо күөстүү оргуйан саҕаланна.
Устудьуоннар хоско 2-4 буолан олороллор. Этээскэ блоктарынан эбэтэр сиэксийэлэринэн арахсаллар. Хас биирдии блокка туалет, суунар хос, душ баар. Ону таһынан, холодильниктаах, билиитэлээх куукуна, таҥас сууйар массыына баар. Уопсайдар санитарнай уонна да атын ирдэбиллэргэ толору эппиэттииллэр. Эмчит кабинеттара үлэлииллэр. Маны таһынан, устудьуоннары кытта психолог ыкса үлэлэһэр. Иитээччилэр уонна эбии үөрэхтээһин учууталлара уопсай олохтоохторун хонтуруоллууллар, кинилэри кытта дьаһал үлэтин ыыталлар.
Уопсай олоҕун туһунан устудьуонтан бэйэтиттэн ордук ким да билбэт. Уопсайга хаһыс да сылын олорор оҕолор санааларын үллэстэллэр:
Кристина Александрова, Дьокуускайдааҕы технологическай өҥө техникумун 2-с кууруһун устудьуона:
— Уопсайга киирэҕин дуу, дьиэ куортамнаан олороҕун дуу диэтэхтэринэ, уопсайбын талыам этэ. Устудьуон олоҕун толору билиэххин баҕарар буоллаххына, уопсайга олоруохтааххын диэн этиини кытта сөпсөһөбүн. Бэйэм этээспэр иккис сылбын ыстаарастанан талылынным, уопсай олоҕор өрүү көхтөөхпүн. Үчүгэй усулуобуйалаах уопсайга олорорбутугар техникуммут салалтатыгар махтанабыт. Биһиэхэ анаан тренажернай саала, актовай саала, остолобуой уонна библиотека үлэлиир. Төрдүс этээскэ кыһыҥҥы саадтаахпыт. Биһиги уопсайбыт өрүү сырдык, ыраас уонна сылаас. Уопсай – мин иккис дьиэм.
Павел Стручков, Арктикатааҕы судаарыстыбаннай култуура уонна искусство институтун 2-с кууруһун устудьуона:
— Уопсайга бииргэ үөрэнэр доҕотторбун кытта олорорум үчүгэй. Мин Дьокуускайдааҕы педагогическай индустрия колледжын уопсайыгар олоробун, онно тоҕус орто үөрэх кыһатын устудьуоннара олороллор. Мин атын үөрэхтэртэн элбэх оҕону кытта билсистим, доҕордостум. Былырыын бары бииргэ спортивнай күрэхтэһиилэргэ кыттааччыбыт. Уопсай олоҕо олус бэһиэлэй уонна интэриэһинэй.
Лаврентий Александров, Дьокуускайдааҕы коммунальнай-строительнай техникум 2-с кууруһун устудьуона:
— Уопсайга олорорбун олус сөбүлүүбүн. Киһи уопсайга олорон ис-иһиттэн арыллар эбит. Мин гитараҕа оонньуурга үөрэнним. Бииргэ олорор уолаттарбын кытта тэҥҥэ уруок ааҕабыт, тутум эргииргэ эрчиллэбит.
Анастасия Павлова, Дьокуускайдааҕы педагогическай индустрия колледжын 4-с кууруһун устудьуона:
— Сыл аайы саҥаттан-саҥа дьону кытта билсэр олус интэриэһинэй. Өрүү араас куонкурустар, күрэхтэһиилэр тэриллэр буоланнар, киһи чуҥкуйбат. Уопсайга олорон киһи эппиэтинэстээх, эйэҕэс буоларга үөрэнэр диэххэ сөп. Биһиги үөрэхпититтэн уопсайга олорор устудьуоннары кытта «Олимп» волонтердар этэрээттэрэ көхтөөхтүк үлэлииллэр, аһымал акциялары, араас десааннары ыыталлар.
Айталина Петухова, edersaas.ru сайтка анаан.