Ахсынньы 3 күнүттэн Дьокуускайга Орто Халыма куорат төрүттэммитэ 375 сылыгар аналлаах улуус күннэрэ буола тураллар. Ол чэрчитинэн бүгүн Арктика дьыалаларыгар судаарыстыбаннай кэмитиэккэ көрсүһүү буолла.
Тэрээһиҥҥэ Арктика дьыалаларыгар судаарыстыбаннай кэмитиэт бэрэссэдээтэлэ Прокопий Николаев, кэмитиэт үгэс буолбут хотугу төрүт салаалары уонна балык хаһаайыстыбатын комплексын сайыннарарар отделын сэбиэдиссэйэ Иннокентий Баланов, Орто Халыма улууһун баһылыга Евгений Слепцов, тыа хаһаайыстыбатын управлениетын салайааччы Гаврил Костромыкин, Ойуһардаах баһылыга Елизавета Жиркова уонна Березовка сэлиэнньэтин делегацията кытыннылар.
Ол курдук, кэпсэтиигэ «Березовскай» казеннай тэрилтэ кыһалҕаларын, кыстыгы туорааһын о.д.а. боппуруостары кэпсэттилэр, ырыттылар. «Ааспыт икки сылга Орто Халыма улууһугар хаар халыҥнык түһэн уонна халаан уута кэлэн хаһаайыстыбаҕа, суолга-иискэ кэккэ ыарахаттары үөскэппиттэрэ. Манан таба, ынах, сылгы ахсааннара аҕйыаата«, — диир улуус баһылыга Евгений Слепцов.
Прокопий Николаев, Арктика дьыалаларыгар судаарыстыбаннай кэмитиэт бэрэссэдээтэлэ:
— Улуус күннэрин чэрчитинэн маннык көрсүһүү буолбута оруннаах. Мин Өлөөҥҥө уон сыл баһылыктаабытым, онон хоту улуус кыһалҕаларын бэйэбинэн билэбин. Төһө даҕаны ыарахан кыстыктар аасталлар, стабилизация барар. Орто Халыма улууһугар уонна чуолаан «Березовка» казеннай тэрилтэҕэ тыҥаан кэлбит кыһалҕалары быһаарарга, көмөлөһөргө бэлэммит.
Айтана Аммосова, «Саха сирэ» хаһыат, edersaas.ru