Саха сиригэр Авиалесоохрана чахчыларынан бүгүҥҥү туругунан, 80 ойуур баһаара умайа турар. Баһаарга былдьаммыт сир иэнэ 261 885,4 гектар, умайа турар ойуур иэнэ 392,83 гектар диэн ааҕыллыбыт.
edersaas.ru
Ааспыт сууккаҕа 20 баһаар үөскээбит, 21 эрдэ күөдьүйбүт баһаар умуруоруллубут. Бүгүн Дьокуускайтан ойуур баһаара чугаһаан үөскээбит кутталы туоратар сыалтан, сүүрбэччэ киһилээх Арассыыйа ЫБМ эрэгийиэннэҕи салалтатын аэромобильнай бөлөҕө Орто Халыма улууһугар көттө. Ону тэҥэ баһаарынайдар Муома оройуонугар көтөллөрө былааннанар.
Уоту утары охсуһууга 949 киһи, 102 анал тиэхиньикэ үлэлиир.
— Алдаҥҥа, Үөһээ Дьааҥыга, Орто Халымаҕа, Кэбээйигэ, Муомаҕа Тааттаҕа, Уус Алдаҥҥа уонна Томпо улууһугар 61 умайа турар баһаардары утары охсуһуу түмүгүнэн, ааспыт сууккаҕа баһаардар иэннэрэ 80 528,6 гектарынан кыччаата. Уот күөдьүйбүт сириттэн чугас сытар сэлиэнньэлэри баһаартан харыстыар үлэлэр ыытылыннылар, — диэн Арассыыйа ЫБМ эрэгийиэннэҕи салалтатын начальнига Павел Гарин биллэрдэ.
Егор Карпов, «Саха сирэ» хаһыат, edersaas.ru