“Аккорд” бөлөх 2016 сыллаахха күһүн Орто Халымаҕа тэриллибитэ. Муусукаҕа тыыппалаах үөрэнээччилэри Владимир Киприянов бэлиэтии көрөн дьарыктаан, тирэҕи уурбута. Ити сылга “Аккордтар” бастакыларын сыанаҕа тахсан, “Созвездие Колымы” диэн ВИА-лар улуустааҕы күрэхтэһиилэригэр кыттыбыттара. Онно көрөөччүлэр биһирэбиллэрин ылбыттара. Бу толорууларынан Дьокуускай куоракка тыыннаах доҕуһуол күрэхтэһиитин кэтэхтэн көрүүгэ Гран-при буолары ситиспиттэрэ. Ити ситиһииттэн сиэттэрэн, Халыма талааннаах ыччата араас хабааннаах куонкурустарга, бэстибээллэргэ кытыннылар.
Бөлөххө Дарья Винокурова, Алина Кокорина – клавишнайга оонньууллар, Алена Кокорина – гитарист, Нина Парилова – бас-гитарист, Сергей Парилов – охсор үнүстүрүмүөҥҥэ оонньуур уонна Мария Соловьева, Айыына Созонова – ырыаһыттар, хомусчуттар.
Бу сыл саҕаланыыта Орто Халыматааҕы Оҕо айымньытын дьиэтигэр баһаар барбыта. “Аккорд” бөлөх оҕолоро биир санааны ылынан, кэнсиэр тэрийэн, уруһуйга, үҥкүүгэ уһуйуллубут оскуолаларыгар саҥа аппаратура ылалларыгар көмө буолбуттара. Инньэ гынан, улуустарыгар үтүө бачыымы саҕалаабыттара.
Оҕолор быйыл оскуолаларын бүтэрэн, Дьокуускайга устудьуоннуу кэллилэр. Киэҥ сиргэ кэлэн, сөбүлүүр дьарыктарын быраҕан кэбиспэтилэр. «Ый суола» бөлөх гитариһыгар Айсен Федоровка дьарыктаналлар.“Аккордар” үс кыыстара олохторун култуураны кытта сибээстээри, култуура уонна ускуустуба Арктикатааҕы институтугар устудьуоннуу сылдьаллара элбэҕи эрэннэрэр.
Халыма эдэр мусукааннара: “Биһиги ситиһиибит барыта улууспутугар эбии үөрэхтээһин үтүө суобастаахтык үлэлииригэр тирэҕирэр. Оскуола саастаах оҕолорго сөбүлүүр дьарыккытын буларгытыгар, иллэҥ кэмҥитин халтайга атаарбаккытыгар, талааҥҥытын сайыннаран, сөптөөх идэни таларгытыгар, оттон биһиги инникитин да бөлөхпүтүн ыспакка, улууспут аатын ааттата туруохпутун баҕарабыт”, — диэн баҕа санааларын өрөспүүбүлүкэ эдэр көлүөнэтигэр тиэрдэллэр.
Ырыа куттаах ыччаты саха муусукатын кэскиллэрэ буолуҥ, үүнүҥ-сайдыҥ диэн алгыыбыт.
Айтана Аммосова, «Саха сирэ» хаһыат, edersaas.ru