Орто халымалар Дьокуускайга аһаҕас халлаан анныгар дискотека тэрийиэхтэрэ
Ахсынньы 3 күнүттэн Дьокуускайга Орто Халыма куорат төрүттэммитэ 375 сылыгар аналлаах улуус күннэрэ саҕаланнылар. Ол курдук, бүгүн “Союз исторических городов Якутии” диэн форум-кэмпириэнсийэ буолла. Маны таһынан, өрөспүүбүлүкэтээҕи медиа-кииҥҥэ улуус салалтата туох тэрээһиннэр былааннаммыттарын туһунан кэпсээтэ.
«Орто Халыма улууһун күннэрин ыытыы сүрүн сыалынан улууспут култууратын, үгэстэрин кытта билиһиннэрии буолар«, — диир улуус баһылыгын солбуйааччы Анна Попова. Улуус күннэрин чэрчитинэн Орто Халыма делегацията тустаах министиэристибэлэринэн, биэдэмистибэлэринэн “төгүрүк остуолларга”, көрсүһүүлэргэ кыттыыны ылыа уонна Ил Түмэн сис кэмитиэттэрин бэрэссэдээтэллэрин кытары көрсүө.
Ахсынньы 5 күнүгэр 16.00 ч. СӨ национальнай ойуулуур-дьүһүннүүр мусуойугар “Из золотого фонда Среднеколымского краеведческого музея” диэн быыстапка арыллыаҕа. Оттон 19.00 ч. Нуучча тыйаатырыгар “Ынахтаах Хотун” диэн Орто Халыма улууһун норуодунай тыйаатырын испэктээгин көрдөрүөхтэрэ. Ахсынньы 8 күнүгэр күнүс 15.00 ч. Доҕордоһуу болуоссатыгар “Амтан” ТХПК атыы-эргиэн дьаарбаҥкатын тэрийиэҕэ. Бу күн 17.00 ч. аһаҕас халлаан анныгар “Самая холодная дискотека” бырайыак саҕаланыаҕа.
Тэрийээччилэр биир дойдулаахтарын, Дьокуускай куорат олохтоохторун уонна ыалдьыттарын тэрээһиннэргэ ыҥыраллар.
Айтана Аммосова, «Саха сирэ» хаһыат, edersaas.ru