Орто Халыматааҕы ньиэп баазатыгар саҥа салайааччыны Вячеслав Попову билиһиннэрдилэр. Хампаанньаҕа кини үп-харчы салаатыгар 2009 сыллаахха үлэлии кэлбитэ, саҥа дуоһунаска ананыан иннинэ ити салаа начаалынньыгын солбуйааччынан үлэлээбитэ.
edersaas.ru
Вячеслав Попов 2002 сыллаахха Хабаровскай куоракка судаарыстыбаннай сулууспа Уһук Илин академиятын бүтэрбитэ. Ити сыл Томскайдааҕы политехническай университекка ньиэп-гаас хайысхатынан идэ ылар куурсу түмүктээбитэ.
Ньиэп баазатын урукку дириэктэрэ Станислав Данилов «Саханефтегазсбыт» управлениетыгар хампаанньа бырамыысыланнаска куттала суох буолуу уонна үлэ охранатын салайааччытынан ананан, дуоһунаһа үрдээтэ. Кини хампаанньаҕа 2012 сылтан үлэлээн, 1 категориялаах үлэһиттэн бааза дириэктэригэр диэри үүнэн-сайдан таҕыста.
Станислав Данилов СГУ ИТФ-тын, ньиэп-гаас хайысхатынан Уфатааҕы университеты бүтэрбитэ. Хампаанньа иһигэр үлэһиттэр миэстэлэрин уларытыы үлэ көдьүүстээх, таһаарыылаах, дьон билиитэ, кыаҕа кэҥээн иһэрин туһугар ыытыллар.
Күн бүгүн Орто Халыматааҕы ньиэп баазатыгар сүрүн пуондалар эргэрдилэр, ГСМ оттукка наадыйыы улаатан, резервуарнай паарка кэҥиэн наада. Баазаны саҥардыы өрөспүүбүлүкэ инвест-бүддьүөтүгэр киирэрин туһугар кэпсэтии барар.
«Саханефтегазсбыт» Орто Халыматааҕы баазата бүтүн улууһу уонна Аллараа Халыма Андрюшкино сэлиэнньэтин ньиэп бородууксуйатынан хааччыйар. Оттугу уу суолунан от ыйыттан балаҕан ыйыгар диэри тиэйэллэр.
Ол туһунан хампаанньа пресс-слууспата иһитиннэрэр.
«Саха сирэ», edersaas.ru