Өлөөҥҥө бастыҥ үлэлээҕинэн биллэр Алла Петрова сэбиэдиссэйдээх «Кэнчээри» оҕо уһуйааныгар кырачааны иитии-үөрэтии, уһуйуу үлэтэ тиһиктээхтик тэриллэр. Бу оҕолор өбүгэлэрин олохторун-дьаһахтарын, үлэлэрин-хамнастарын, үгэстэрин, сиэрдэрин-туомнарын билэ улааталларыгар көмөлөөх.
Соторутааҕыта уолаттарга «Орончикан» диэн күрэхтэһии олус сэргэхтик, көхтөөхтүк ыытыллыбыт. Кырачаан спортсменнар кинилэргэ анаан оҥоһуллубут наартаны ойбуттар, ырааҕы ыстаммыттар, кэккэлээн хаампыттар, сүүрбүттэр-көппүттэр. Этэргэ дылы, эрбии тииһин курдук эгил-тэгил киирсибиттэр. Оттон кыргыттар көхтөөх көрөөччүлэринэн буоланнар, күрэхтэһиини күүркэтэн биэрбиттэр.
Уһуйаан үлэһиттэрэ сыл ахсын маннык күрэхтэһии ыытыллар буолан, оҕолор сүүрэллэрэ-көтөллөрө түргээтээн, тутталлара-хапталлара сыыдамсыйан, билэллэрэ-көрөллөрө элбээн иһэрин бэлиэтииллэр.
Хаартыскалар: «Кэнчээри» оҕо уһуйааныттан (Өлөөн)